کابل ټکی کام( پنجشنبه، ۳۰غبرګولي، ۱۳۹۸)
د ایران ولسمشر حسن روحاني وایي، د امریکا دا کار غیر عاقلانه دی چې د فشار او خبرو اترو پالیسي همهاله مخته وړي.
روحاني چې د ایران د دولتي تلویزون له لارې یې وینا کوله ویلي چې ایران به د امریکا د فشارونو په نتیجه کې هېڅکله هم خبرو ته تیار نه شي.
نوموړي دا خبره څه وخت مخکې هم کړې وه او ویلي یې وو چې امریکا باید یو ځل له ایرانیانو بښنه وغواړي.
روحاني همدا رنګه وایي چې دوی د خپل هیواد دفاع ته په هر قیمت تیار دي او دعوه یې کړې چې څوک وړتیا نه لري ترڅو د ایران په وړاندې له نظامي قوته کار واخلي.
حسن روحاني دا خبرې وروسته له هغه کوي چې د امریکا د بهرنیو چارو وزیر مایک پمپیو عراق ته د خپل سفر پر مهال ویلي وو، ایران به سخت پوروړی شي.
په ورته وخت کې ایران د امریکا د یوې څارګرې الوتکې د ویشتلو ادعا هم کوي او وایي چې د ایران له هوایي حریم راتېره شوې وه خو امریکا بیا وایي چې الوتکه یې ویشتل شوې البتة د ایران په خاوره کې نه.
