(کابل ټکی کام، ۱۳۹۸، غبرګولی ۳۰)
د افغانستان دفاع وزارت د تير کال په وروستيو کې ويلي و چې د عسکرو د تلفاتو له امله د هيواد په ليرې پرتو سيمو کې به پوستې راټولي کړي چې تازه دغه لړۍ پيل شوې ده.
د ۲۰۳ تندر قول اردو او د سویل ختیځ زون عمومي قوماندان جنرال دادان لونګ وايي، پوستې یو مات شوی تکتيک چې له کبله يې د دولتي ځواکونو پنځوس سلنه تلفات پر پوستو د بريدونو له امله رامنځته کيږي.
نوموړي وويل، له ۲۰۱۴کال راهيسې چې دولتي ځواکونو له بهرنيانو امنيتي مسؤوليت ترلاسه کړی لسګونه زره عسکر په پوستو کې د طالبانو د بريدونو په ترڅ کې وژل شوي دي.
څه موده مخکې په افغانستان ميشت امریکايي چارواکو هم له افغان حکومت غوښتنه کړې وه چې د ليرې پرتو سيمو پوستې راټولې کړي.
په عين حال کې دادان لونګ د فرانسې خبري اژانس ته ويلي، مونږ غواړو چې دغه ټولې پوستې د اوس لپاره وتړو او پر ځای يې لوی پوځي مرکزونه جوړ کړو .
که څه هم د هيواد ليرې پرتې سيمې تر ډيره د طالبانو تر حاکميت لاندې دي خو په بيلابيلو برخو کې د دولت ځينې پوستې شتون لري چې د طالبانو د بريدونو او د عسکرو د تلفاتو د مخنيوي له ويرې يې امنيتي مسؤولينو د ورټولولو چارې پيل کړي دي.
د پوستو د تړلو په موخه دادان لونګ، په افغانستا کې د ناټو ځواکونو عمومي قومندان سکاټ ميلر او امريکايي پوځي چارواکو سره ځينو ولايتونو ته سفرونه پيل کړي چې په میدان وردګو کې د همدې سفر پر مهال د يوې غونډې په ترڅ کې ميلر وويل، د پوستو تړل افغان ځواکونو ته حیاتي ارزښت لري او دغه پوستې ډيرې خطرناکې دي.
یادو چارواکو پکتيا ته هم سفر کړی او تيره ورځ غزني ولايت ته د سفر پر مهال د طالبانو تر بريدونو لاندې هم راغلي دي.
طالب وياند ذبیح الله مجاهد په خپله رسمي ټويټرپاڼه ليکي، د امريکايي عسکرو عمومي قومندان میلر او د قول اردو قومندان دادان لونګ د غزني خواجه عمري ولسوالۍ په اقصا سيمه کې د طالبانو تر بريدونو لاندې راغلل چې په ترڅ کې يې د دادان لونګ څلور ساتونکي وژل شوي، ګڼ نور ټپيان دي.
