د خليلزاد ټويټونه طالبانو ته ځواب؟؟ که افغان دولت ته د مورال لوړول!؟

غورځنګ
دا چې د مذاکراتو په تېرو شپږو پړاوونو کې ډېر څه د ناندريو په شکل تېر شول او ډېرې نادرې او ناولدې خبرې تېرې شوې خو دغو ناندريو او خبرو نه د طالبانو دريځ بدل کړ او نه يې هم د امريکا چلونو او دوکو او فرېبونو ته د عمل جامه ورواغوستله.
د دې ټولو ناندريو تر څنګ کله نا کله بیا د خليلزاد او د طالبانو د وياند تر منځ کله نا کله د ټويټونو مقابله هم تر سره کېږي، چې په دغو اکثره مقابلو کې خليلزاد د تل په څېر بايلونکی ښکاري. مګر پر وړاندې يې طالبان د ټويټ په ميدان کې هم ګټونکي ښکاري.
دغه مقابلې خصوصاً هغه وخت تر سره کېږي چې کله يو پړاو مذاکرات په ختمېدو شي او او يا هم بل پړاو پيل کېدونکی وي، يا هم هغه وخت وي چې خليلزاد د کوم پړاو د مذاکراتو لپاره مختلفو هېوادونو ته سفرونه شروع کړي او يا هم سيمه ييزو او ګاونډيو هېوادونو ته د دې لپاره سفرونه پيل کړي تر څو په طالبانو باندې له هرې ممکنه لارې څخه فشار راوړي.
دغه د ټويټونو مقابله چې پکې خليلزاد هر وخت ملامت ښکاري؛ د شنونکو په باور له ډې ډول ټويټونو څخه د خليلزاد هدف او موخه دا نه وي چې طالبانو ته ځواب ورکړي بلکې هدف يې د کابل شړېدلې ادارې ته د ډاډ او مورال لوړل وي.
د شنونکو په باور کله چې تېره ورځ د طالبانو د سياسي دفتر وياند سهيل شاهين په خپل ټويټ کې ليکلي وو چې ګواکې امريکا ورسره د خبرو په جريان کې پر دوو مسائلو توافق کړی چې يوه يې له افغانستان څخه د ټولو امريکايي ځواکونو وتل دي او بله يې له ايئنده افغانستان څخه کوم بل هېواد ته د تهديد نه پېښول دي.
خو خليلزاد بيا د طالب د سياسي دفتر وياند د پورتني ټويټ په ځواب کې ويلي وو چې امريکا يوازې د خپلو ځواکونو پر وېستلو سوله نه کوي بلکې د سولې هر اړخ په نظر کې لري، چې هغه اړخونه يې د څواکونو وتل، له افغانستان څخه د نه تهديد مسئله، له افغان حکومت سره د سولې مذاکرات او بله د اروند مسئله ده.
شنونکي د خليلزاد د دې ټويټ په اړه وايي چې د خليلزاد نوموړی ټويټ طالبانو ته ځواب نه بلکې د کابل ادارې ته د مورال وربښل او لوړل دي. ځکه چې په اوس وخت کې د کابل اداره د منزوي کېدو په حال کې ده او بيخي دغې مرحلې ته نږدې ده، نو د دې لپاره چې د امريکايانو دغه غلامان خپل مورال ونه بايلي؛ خليلزاد يو ټويټ د دې لپاره کوي تر څو ظاهراً يې طالبانو ته د ځواب په شکل وښيي خو په دننه کې بيا دغه ټويټ د کابل ادارې ته د مورال بښل او دا ورفهمول دي چې ګواکې امريکا او ناټو له تاسو سره ولاړ دي او په هېڅ صورت نه غواړي چې ستاسو ګټو ته تاوان ورسوي.
تر دې مخکې هم يو ځل خليلزاد په خپل ټويټ کې له طالبانو غوښتي وو چې خپلې وسلې پر ځمکه کېږدي خو طالب وياند بيا په سختو او کلکو ټکو دغه ټويټ وغانده او د ځواب په شکل يې ورته وويل چې خپل دغه خوب اوبو ته ووايه! چې پدې واسطه خليلزاد خپله خبره داسې تعبير کړه چې ګواکې زما د وسلې ايښودلو خبره ټولو ښکيلو اړخونو ته ده او يوازې طالبانو ته نه ده.
نو که په رښتينيې او بې تعصبه توګه د خليلزاد ټويټونه مطالبه کړل او بيا پرې ښه ژوره څېړنه تر سره شي، نو وبه ليدل شي چې د خليلزاد ټويټونه طالبانو ته د ځواب په شکل نه دي او نه هم خليلزاد له خپلو ټويټونو څخه طالبانو د ځواب هدف لري بلکې يوازېنی هدف يې د کابل کاواکه ادارې ته د مورال وربښل دي.
خو هغه د چا خبره جنګ د ډوزو او خبرو کار نه دی بلکې د ډزو او عمل کار دی.
نو که خليلزاد چېرته له خپلو دغه ډول ټويټونو څخه دا هدف لري چې د کابل ادارې عسکرو او د پوځيانو مورال ورلوړ کړي، نو دا خوب دې اوبو ته ووايي، ځکه چې جنګ په تشو خبرو نه کېږي بلکې ټينګ عزم او ايمان غواړي.