ډاکټر يوسف اکبري
د هر هېواد وګړي د خپلو حکومتونو له چارواکو دا هيله لري چې د دوی د ژوند په ښه والي کې هر اړخيز رول و لوبوي او دا څه په خيرات کې ورڅخه نه غواړي بلکې دا يې مسلم حق دی، د دولت پر ګدۍ د ناستو حکومتي چارواکو مسئوليت دی ځکه چې د همدې لپاره خلکو رايه ورکړې او د همدې لپاره د خداي ج پر کتاب لوړه کړې او د همدې لپاره پر معاش اخيستو برسيره دولتي امتيازات تر لاسه کوي.
خو متاسفانه چې زمونږ په هيواد لکه د نورو هر ډول چارو په څېر دا چارې هم برعکس دي او هغه داسې چې لومړی د ټاکنو پايلې په آسانه نه فاينل کيږې، او که له مياشتو، میاشتو مجهول ځنډ وروسته پايلې اعلان شوې نو هغه وروستنۍ نه وي.
او کله چې وروستنۍ شوې؛ اوس پارلمان کې د رياست پر چوکۍ جوړجاړی نه راځي، ټول يو بل ته د ګواښ په مرچلو کې ناست دي او د دې کشمکش يواځينی لامل هم دادی چې پارلمان مو د پير او پلور په مرکز بدل شوی، د ایمان او ناموس سودا پکې روانه ده.
پلورل شوي وکیلان ځان پېژني، په دې دې پوه شي چې تاریخي عار په میراث پرېږدي او دا ډول اشخاص نه يواځې دا چې ځان شرموي بلکې قام شرموي.
