(کابل ټکی کام، ۱۳۹۸، چنګاښ ۷)
د راپورونو له مخې، د ننګرهار ولايت په وخوګياڼو ولسوالۍ کې د طالبانو او داعش وسله والو تر منځ نښته روانه ده چې دواړو غاړو ته پکې مرګ ژوبله اوښتې ده.
یوې باوري سرچينې کابل ټکی کام ته وويل، چې نن د جمعې په ورځ سهار مهال د يادې ولسوالۍ په مرکخيلو تنګي کې پر داعش وسله والو بریدونه پيل کړي دي.
د سرچينې په وينا، د مرکيخيلو لغړ څپری او وډيسار لوړې څوکې چې مخکې پکې داعش وسله والو سنګرونه جوړ کړي و د طالبانو لاسته ورغلي دي.
راپور زياتوي، لغړ څپری او د وډيسار په لوړه څوکه کې د داعش یوه، یوه پوسته مقاومت کوي چې لا هم د طالبانو تر بريدونو لاندې دي.
ويل کيږي، په نښتو کې دواړو غاړو ته مرګ ژوبله اوښتې خو تر دې دمه د تلفاتو کره شمير نه دی په ډاګه شوی.
په سوشل ميډيا تازه د هغو سيمو ويډيوګانې او انځورونه خپاره شوي چې تازه د طالبانو لاسته لويدلي دي.
څو ورځې مخکې طالبانو د کنړ په درې ولسواليو کې پر داعش وسله والو عمليات وکړل چې په ترڅ کې يې د دغه ولايت زياتې سيمې د داعش له شتون پاکې کړې.
ځايي سرچينې او طالبان وايي، په کنړ کې د داعش ځينې قومندانان او وسله وال د دوی تر کلابندۍ لاندې و چې د ګډ حکومت چورلکو يې مرسته وکړه او له ځان سره يې پورته کړل.
په ولسي جرګه کې د ننګرهار پخوانيو استازو، طالبانو او شنونکو په بار بار ويلي چې داعش وسله والو سره د حکومت او امريکايانو له لوري مرسته کېږي او کله چې هم د طالبانو تر بريدونو لاندې راغلي نو نامعلومه چورلکې يې ملاتړ ته ورځي.
دغه راز روسيې هم څو ځلې ادعا کړې چې په افغانستان کې د نامعلومه چورلکو له لوري د داعش وسله والو ملاتړ کېږي او هغوی له یوې سيمې بلې ته لېږدول کيږي.
