کابل ټکی کام( شنبه، ۸چنګاش، ۱۳۹۸)
تر یوې میاشتې زیات وخت کیږي چې د ولسي جرګې د ریاست د څوکۍ پرسر جنجالونه دي، تر دې چې دا جنجالونه په فزیکې شخړه واوښتل.
په لومړي سر کې د ریاست د څوکۍ لپاره څلورو کسانو کمال ناصر اصولي، میر رحمان رحماني، عمر نصیر مجددي او میرویس یاسیني ځانونه نوماندان کړل خو یو هم ونه توانید چې ټاکلې رایې ترلاسه کړي او د ولسي جرګې ریاست څوکۍ وګټي.
په دوهم پړاو ټاکنو کې د میر رحمان رحماني او کمال ناصر اصولي ترمنځ سیالي وه چې رحماني د ۱۲۳رایو په ترلاسه کولو سره د ولسي جرګې د مؤقت رئیس دهقانپور لخوا ګټونکی اعلان شو.
کمال ناصر اصولي او پلویانو یې دا پرېکړه ونه منله او ویې ویل چې دوی دا نه مني، که داسې وي نو اصولي هم د جرګې رئیس دی.
د دوی په وینا چې په دې ورځ په جرګه کې ۲۴۷وکیلانو وجود درلود او د ریاست څوکۍ لپاره باید کاندید ۱۲۴ رایې ترلاسه کړې وای، خو یو هم نه دی توانیدلی نو په دې توګه سره رحماني هم رئیس نشي ټاکل کیدای.
د دوی دواړو او پلویانو ترمنځ ناندرۍ زور واخست او خبره تر فزیکې شخړې ورسیده، د وکیلانو په لاسونو کې پیچکشونه او پلاسونه ولیدل شول او خپاره شويو اډیویي کلیپونو وښوده چې جنجال قومي او سمتي بڼه غوره کړې ده.
اصولي په وکیلانو تور پورې کړ چې خپلې رایې یې د ډالرو په بدل کې پلورلي دي، نوموړي وویل چې پخپلو سترګې یې له تشنابونو سره یو وکیل ولید چې ډالر یې واخستل او په خبره یې چې بیا وروسته د بښنې او د دې موضوع د پټ ساتلو په اړه راته راغی.
دې جنجالونو تر میاشتې ډیر وخت ونیو او جرګه نشوای توانیدلی چې دا مسئله حل کړي، حتی تر دې چې میزونه او کرسۍ ماتې شوې.
په جرګه کې ځینو وکیلانو راپور تر لاسه کړی وو چې ولسمشر غني به د جرګې دروازه وتړي خو ارګ ماڼۍ دا راپور بیرته رد کړ.
د جنجال د هواري لپاره فیصله وشوه چې نور نوي کاندیدان به ځانونه نوماندانوي چې په دې سره څو ورځې وړاندې دریو کسانو میر افغان صافي، احمد جاوید جیحون او واقف حکیمي ځانونه نوماندان کړل او په دوی کې هم یو ونه توانید چې پنځوس یو جمه رایې ترلاسه کړي، دلته هم ټاکنې دوهم پړاو ته ولاړې او د میر افغان صافي او جاوید جیحون ترمنځ مقابله ترسره سوه، چې بیا هم هېڅوک بریالی نه شو.
د درېیم ځل لپاره څلورو نورو صدیق احمد عثماني، حاجي خان محمد وردګ، خان اغا رضایي او عبدالستار حسیني ځانونه نوماندان کړل چې په دوی کې هم څوک ونه توانیدل پنځوس جمه یو رایې ترلاسه کړي.
له دې وروسته فیصله وشوه چې په ټولو تیرو شویو بهیرونو کې چې چا ډیرې رایې اخستي، د هغو دوو کسانو ترمنځ به سیالي کیږي چې په دې سره حاجي خان محمد وردګ او لومړنی جنجالي نوماند میر رحمان رحماني مقابلې ته سره راووتل.
د دوی دواړو ترمنځ نن سیالي وه.
په ننۍ سیالي کې ۱۲۴ ساده رایې د ګټې معیار ټاکل شوی وو.
د دوی دواړو ترمنځ نن مقابله ترسره شوه چې میر رحمان رحماني د ۱۳۶ رایو په ترلاسه کولو سره د ولسي جرګې د رئیس په توګه وټاکل شو.
