سرمقاله
تیره ورځ د جون پر نهه ویشتمه د امریکا او طالبانو له اعلان سره سم د دواړو خواوو ترمنځ اووم پړاو خبرې پیل شوې او نن د اووم پړاو دوهمه ورځ ده چې خبرې روانې دي.
د طالبانو او امریکایانو ترمنځ چې په تیرو او اوسنیو پړاوونو کې د خبرو کومه اجنډا وه/ده، هغه دوه ټکي دي: له افغانستانه د امریکایي ځواکونو وتل او د طالبانو لخوا امریکا ته دا ضمانت ورکول چې د افغانستان خاوره به د چا په ضد نه کارول کیږي.
په تیرو شپږ پړاو خبرو کې دواړه لوري په همدې دوو موضوعاتو په ورځو ورځو تم شول او پرې وغږیدل خو کومې مطلوبې نتیجي ته رسیدلي ښکاره نه شول او نه هم له یو لوري داسې څه واورېدل شول چې په هغه دې د افغانانو اندېښنې رفع او نوې خبرې ته څک غوږونه د ارامۍ احساس وکړي.
د امریکا او طالبانو ترمنځ د اووم پړاو خبرې د نورو شپږو پړاوونو په نسبت مهمې او سرنوشت سازه ښکاري؛ ځکه د دې راونډ تر پیل مخکې د دواړو خواوو نه د خوشبینۍ او د یوې ترلاسه کیدونکې نتیجې خبرې اوریدل شوي دي.
د طالبانو د مشرانو په ګډون د امریکایي چارواکو د خبرو نبض هم داسې محسوسیږي چې ممکن د دواړو خواوو استازي دا ځل له یو قاطع او واکمن دریځ سره د خبرو میز ته حاضر شوي وي او د افغانانو د هیلو موافق به یوه برخلیک ټاکونکې هوکړه اعلان شي.
د دې خبرو تر پیل فقط څو ورځې مخکې کابل ته د امریکا د بهرنیو چارو وزیر مایک پمپیو سفر او دلته یې بیا د حکومتي چارواکو په ګډون د هغو سیاسي څېرو سره لیده کاته چې هغه د طالبانو سره په بین الافغاني ناستو کې مهم رول لوبوي، هم ښایي د امریکا او طالبانو د روانو خبرو سره تړاو ولري.
داسې ښکارېده چې مایک پمپیو له افغانستانه د امریکا د وتلو له خبرې سره حکومتي چارواکي اشنا کول، لکه څنګه چې یې له رسنیو سره هم په واضح ډول وویل: ښایي د دوو میاشتو په اوږدو له طالبانو سره یوې موافقې ته ورسیږو او خپل ځواکونه له افغانستانه وباسو.
نو په عموم کې چې د اووم پړاو خبرو نه مخکې حالات وارزوو، د امریکایي او طالب چارواکو خبرو ته په دقیق نظر ځیر شو او تیر شپږو پړاونو ته وګورو نو طبعاً ویلی شو، چې غړکه دومره وشاربل شي، هرو مرو کوچ ترې راوځي او غوړه مړۍ زموږ لاس ته راځي.
که فرضاً اووم پړاو خبرې هم بې له کومې نتیجې پای ته ورسیږي نو ممکن طالبان له امریکایانو سره د خبرو روانه لړۍ ودروي او تجدید نظر ورباندې وکړي، خو که د امریکا حالاتو ته نظر وکړو او په دې برخه کې د ټرمپ تلوسه تر څار لاندې ونیسو نو ویلای شو، چې امریکا نوره دې نتیجې ته رسیدلې چې د افغانستان مسئله حل او یو اړخ ته کړي؛ ځکه چې ټرمپ د افغانستان د جګړې د ختمولو کریډټ ته په ټاکنو کې زیات ضرورت لري او همدا رنګه امریکا په نورو نړیوالو مسائلو کې هم راایساره ده، چې په هغه کې د نه پرمختګ یو علت په افغانستان کې د امریکا ښکلتیا بللی شو، له همدې امله په پوره باور سره یو ویلای شو چې امریکا به په هر صورت له افغانستانه خپله شړۍ ورټولوي. ان شاءالله
