(کابل ټکی کام، ۱۳۹۸، چنګاښ ۱۰)
طالبانو د کابل ښار د دوهمې حوزې مربوط د چاودنې او وسله والو بريدونو مسؤوليت ومانه وايي، چې یاده سيمه کې يې د دفاع وزارت اړوند د لوجستيک او انجينرينګ مرکزونه په نښه کړي دي.
طالب وياند ذبیح الله مجاهد کابل ټکی کام ته په راليږلې خبرپاڼه کې ويلي، چې لومړی په سيمه کې د موټربم په وسيله د دفاع وزارت په یادو څانګو چاودنه شوې او وروسته سرتيري بريدګر د دفاع وزارت مربوطه ودانيو ته داخل شوي دي.
خبرپاڼه کې راغلي، تر دې دمه په چاودنه او وسله والو بريدونو کې لسګونه عسکر، افسران او د دفاع وزارت کارمندان وژل شوي او ټپيان دي زياتوي لا هم د یاد وزارت اړوند تأسيسات تر بريدونو لاندې دي.
نن سهار د نهه بجو په شاوخوا کې د کابل ښار پل محمود خان سيمه کې د دفاع وزارت د لوجستيک او انجينرينګ مرکزونو مخې ته لومړی د موټربم درنه چاودنه وشوه او وروسته د یاد وزارت مربوط ودانيو ته بريدګر ننوتل.
د روغتيا وزارت چارواکي وايي، تر دې دمه نږدې څلويښت ټپيان روغتونونو ته د تداوۍ لپاره وړل شوي دي.
ويل کيږي، د چاودنې له کبله د نږدې ودانيو ښیښې ماتې شوي چې ډيری ملکي کسان يې ټپيان کړي دي.
یوې امنيتي سرچينې د نوم نه ښودلو په شرط رسنيو ته په لومړنيو معلوماتو کې وويل، چې د چاودنې او وسله والو بريدونو له کبله د دغه وزارت اړوند له ديرشو تنو زيات کارکوونکي وژل شوي او لسګونه تنه نور ټپيان دي.
طالب ویاند ذبیح مجاهد ويلي، ” د برید هدف ملکي خلک نه، بلکې د دفاع وزارت اړوند څانګې وي، چې موټربم او مجاهدین هغو خپلو اهدافو ته رسیدلي دي”.
عيني شاهدان وايي، لا هم د پيښې ځای کې ډزې روانې دي او دولتي ځواکونو سيمه کلابنده کړې ده.
