کابل ټکی کام (دوشنبه ، ۱۰ چنګاښ ، ۱۳۹۸ل)
پاکستاني رسنیو راپور ورکړی چې ددې هېواد په ملتان ایالت کې یو کس د خپلې کورنۍ لس تنه وژلي دي او دکور هرڅه یې سوځولي.
راپور زیاتوي، دې کس د کورنۍ شخړې له امله په دې عمل لاس پورې کړی او درنه مرګ ژوبله یې اړولې.
د پاکستاني پولیسو په خبره دا پېښه تېره شپه ناوخته رامنځته شوې ده.
راپورونه وایي، د ملتان په حسن اباد سیمه کې د دوو کورنیو ترمنځ تر کورنۍ شخړې وروسته یوه کس د خپلې ښځې، اولادونو او خواښې په ګډون لس کسان وژلي او کور ته یې اور اچولی دی.
چارواکي دا پېښه ناموسي وژنه بولي.
د ویلو ده چې دا پاکستان کې د ناموسي وژنو لومړۍ پېښه نه ده بلکې تر دې وړاندې هم په یاد هېواد کې ورته ګڼې پېښې رامنځته شوې دي.
ددې کس په اړه لا هم کره مالومات نشته چې دی نیول شوی او که په تیښته بریالی شوی.
