جوزجان: طالبانو د قوش تيپه ولسوالۍ سقوط کړې؛ ۷۸ عسکر يې ژوندي نيولي
(کابل ټکی کام، ۱۳۹۸، چنګاښ ۱۱)
تيره شپه د جوزجان ولايت په قوش تيپه ولسوالۍ طالبانو بريد کړی چې د ځايي سرچينو او طالب وياند په وينا ولسوالۍ د طالبانو لاسته لويدلې او له اويا زيات عسکر طالبانو نيولي دي.
طالب وياند ذبیح الله مجاهد په خپله رسمي ټويټرپاڼه ليکي، طالبانو د جګړې په ترڅ کې یاده ولسوالۍ او شاوخوا ټول تأسیسات نيولي، لس عسکر وژل شوي، پنځه ويشت ټپيان او ۷۸ تنه نور طالبانو ته ژوندي په لاس ورغلي دي.
د مجاهد په وينا، یو شمير نور عسکر په سيمه کې پټ شوي چې د طالبانو له خوا يې د لټون عمليات روان دي.
نوموړی وايي، په یاده ولسوالۍ کې لسګونه ميله سپکې او درنې وسلې، مهمات او ګڼ شمير نقليه وسایط هم د طالبانو لاسته لويدلي دي.
د جوزجان د امنيې قومندانۍ امنيتي سرچينې وايي، تيره شپه په یادې ولسوالۍ طالبانو بريد کړی او د همدې ولسوالۍ له پرسونل سره يې اړيکې پرې شوي دي.
ويل کيږي، په قوش تپه ولسوالۍ کې د ملي اردو، امنيت، پولیس او اربکيانو له دوه سوه څخه زيات منسوبين موجود و چې ډيری يې تسليم شوي او یو شمير نور په شاوخوا سيمو کې د جګړې له کبله پټ شوي دي.
طالبانو څو ورځې مخکې د کندهار معروف ولسوالۍ هم نيولې وه.
په وروستيو کې طالبانو خپلو عملياتو ته زور ورکړی چې قرارګاوې، پوستې او پوځي قطارونو بريدونو کې سلګونه عسکرو ته مرګ ژوبله اړولې ده.
