کابل ټکی کام (سه شنبه ، ۱۱ چنګاښ ، ۱۳۹۸ل)
ولسمشرۍ ماڼۍ دراتلونکي بین الافغاني کانفرانس خبر ورکړ، او زیاته کړې یې ده چې حکومتي مشران به دحکومت په استازیتوب نه بلکه په شخصي ډول ګډون کوي.
ولسمشرۍ ماڼۍ کې سرچینو تاید کړې چې د روانې جولای میاشتې پر اوومه او اتمه نېټه به په دوحه کې بین الافغاني دیالوک ترسره کېږي.
سرچیني زیاته کړې، دا ناسته د افغان حکومت او طالبانو ترمنځ د سولې مذاکرات نه دي، او ګډون په انفرادي یا شخصي بڼه دی.
د ګډ دولت دمشر محمد اشرف غني ستر سلاکار فضل محمود فضلي رسنیو سره خبرو کې وویل، د افغان حکومت او طالبانو استازي به په دې ناسته کې ګډون کوي، خو د حکومت یا د طالبانو د استازو په توګه نه.
دا ناسته په اصل کې د جرمني د برګهاف بنسټ له خوا تنظیم شوې ده، او د کوربتوب چارې به یې د جرمني او قطر حکومتونه پر مخ وړي.
یو بل مهم او جالب ټکی دا دی چې په دې ناسته کې به د افغانستان پخوانی ولسمشر حامد کرزی، د هغه سلاکاران او د راتلونکو ولسمشریزو ټاکنو نوماندان ګډون نه کوي.
د ولسمشر سلاکار فضل محمود فضلي زیاتوي، د غونډې اجنډا به د ناستې پر لومړۍ ورځ پخپله د ګډونوالو لخوا ټاکل کېږي، او منتظمین به دې برخه کې یوازې سلا مشوره ورکوي.
ده زیاته کړه چې په دې ناسته کې به شاوخوا ۶۰ کسان ګډون کوي، خو د هغو کسانو نومونه یې یاد نه کړل چې په حکومت کې دي او دې خبرو کې به ناست وي.
دطالبانو دسیاسي دفتر ویاند سهیل شاهین هم دخارجي ځواکونو دمهال وېش تر اعلان وروسته د ورته کانفرانس خبر ورکړی.
دا لا مالومه نده چې طالبان به دمهال وېش تر اعلان وړاندې دې کانفرانس ته تیاری ونیسي که نا؟
دا هم لا څرګنده نده چې طالبان به په شخصي او که دخپل امارت په نمایندګۍ ګډون وکړي!
