کابل ټکی کام( سه شنبه، ۲۵چنګاش، ۱۳۹۸)
د ایران د بهرنیو چارو وزیر جواد ظریف په امریکا کې دی او هلته دننه پرې یو لړ بندیزونه لګیدلي دي.
که څه هم امریکایي چارواکو ویلي وو چې په ظریف د څه وخت لپاره بندیزونه نه لګوي خو اوس تازه امریکا خبرداری ورکړی چې جواد ظریف له یو څو محدودو ځایونو پرته بل ځای ته سفر نه شي کولی.
ملګرو ملتونو هم د امریکا لخوا پر ظریف د بندیزونو خبره تائید کړې او اندېښه یې پرې ښودلې ده.
د امریکا د بندیزونو له مخې، جواد ظریف یوازې خپل استوګنځي، د ملګرو ملتونو مقر او هوایي ډګر ته تګ راتګ کولای شي.
دا په داسې حال کې ده چې د تهران او واشنګټن ترمنځ اړیکې سخت ترینګلي حالت ته رسیدلي او ځیني نور ایراني چارواکي هم د امریکا تر بندیزونو لاندې دي.
امریکا په ایران سخت اقتصادي بندیزونه لګولي دي.
