راټولوونکى: ډاکټر يوسف اکبري
کله چې د دوه چرګانو خوا ته يو ه چرګه راشي ، دواړه چرګان په خپل منځ کې جنګ کوي تر څو يو چرګ له هغه ځايه ولاړ شي . مګر له بده مرغه د بېروت او اسکندريې د سواحلو په غاړو کې د مسلمانانو ښځې لوڅې او بربنډې وي ، ټول سيلانيان يې د لوڅ او نازک بدن ننداره کوي او مېړونو ته هيڅ غيرت سترګو ته نه درېږي ، د شپې محفلونو کې ځينې متمدن او پرمختللي مسلمانان خپلې ښځې خپلو ملګرو ته ور ډالۍ کوي تر څو له هغوى سره وګډېږي . چې دا نامحرمه سړيان بيا له هغو غافلو ښځو سره سينه په سينه او لاس په لاس ګډېږي . دا حالت پدې ډول محفلونو کې ډېر عام شوى دى چې هيڅوک ترې سترګې نشي پټولى .
په اسلامي پوهنتونونو کې نجونو خپل ځانونه نيم بربنډ کړي دي او د ځوانانو سره څنګ په څنګ په يوه څوکۍ کېنې مګر مسلمان مور او پلار دا حالت نه غندي او نه يې ردوي .
دا داسې قضايا دي چې په يو ځل او يو وار نشو کولى هغه حل او يا له منځه يوسو .
مګر بېرته حق ته ستنېدل له هغې لارې شوني دي ، له کومي لاري چې باطل ته تللي يو . که څه هم ددې لارې وهل اوس مونږ ته اوږده ښکاري ، سمه ده څوک چې يوه اوږده لار چې له هغې پرته بله لار نه وي ونه وهي هيڅکله به خپلې موخې ته ونه رسېږي .
راځئ چې د حق لارې ته د راستنېدو په موخه مبارزه د ښځو اونامحرمو نارينه و له يو ځاى کېناستو څخه پيل کړو (( ښوونځى ، پوهنتون ، اداره … ))
بې حجابي له يو ځاى کېناستو سره توپير لري . د مخ لوڅوالى که د نجونو په عفت او عزت باندې د تيري لامل نشي موضوع يې نسبتاً اسانه ده او که چېرې د مخ له لوڅوالي څخه د فتنې د را ولاړېدو وېره موجوده وي نو بيا دمخ پټوالى هم واجب ګرځي . خو ددې ټولو سره ، سره سَتر او حيا ښه شى دى .
اما د نرانو او ښځو ګډه ناسته ولاړه بيا بل شى دى . پلو نه نيول او بې حجابي ددې غوښتونکې نه ده چې يو ښځه دې د نامحرم کس او يا دې د خپل مېړه انډيوالانو سره په کورکې لوڅ سر کېنې او د هغوى ښه راغلاست دې وکړي . او يا دې په بازار او کوڅو کې د نامحرمو کسانو سره ستړي مشي وکړي او يا دا چې يوه نجلۍ دې په پوهنتون کې د يوه نامحرم ټولګيوال سره څنګ په څنګ کينې او دا هېر کړي چې خداى ( جل جلاله ) دا ښځينه او هغه نارينه پيدا کړى دى . د دواړو په خټه کې يو بل ته د نژدېوالي ميل اغګل ( ترکيب ) شوى دى . هيڅوک نشي کولى د خداى ( جل جلاله ) په خلقت کې تغير رامنځته کړي او ددې دواړو متغيرالجنس په منځ کې برابرى او مساوات رامنځته او ددوى له نفسونو څخه د نژدېوالي ميل ليرې او يا له منځه يوسي .
هوکې لورې ! د مدنيت په نوم د ښځينه و او نارينه و تر منځ د مساواتو او ګډ اوسېدلو مبلغين او دعوت کوونکي له دوه اړخونو دروغجن خلک دي .
الف :- دا هغه خلک دي چې د خپلو جنسي غريزو د پوره کولو څخه پرته بله هيڅ کومه موخه نه لري .
دا کسان د خپلو ناوړه او شومو موخو د څرګندولو جرئت نشي کولى نو ځکه خپلو موخو ته د رسېدلو لپاره د تمدن ، ديموکراسۍ او پرمختګ نارې وهي . ددوى موخې ظاهراً ډېرې ښکلې او په باطن کې د شهوت سړولو او فساد خپرولو په رنګ لړلې دي .
ب :- دا کسان ځکه دروغجن دي چې دوى حق د باطل په مقابل کې نشي پېژندلى .
ددوى لپاره حق هغه دي چې چې له برلين ، پاريس ، امريکا او جرمني څخه راغلي وي . که څه هم هغه ګډا، زنا او يا هم د سواحلو په غاړو کې د ځانونو لوڅول وي . او ددوي لپاره باطل هغه دي چې له شرقي مدرسو او الاذهر او اموي پوهنتونونو څخه راغلي وي که څه هم هغه د ځان او عفت ساتلو نمونه وي.
