دپاکستان سرحد ته څېرمه؛ دایران دانقلاب ګارډ څلورو غړو ته مرګ ژوبله اوښتې
کابل ټکی کام (یکشنبه ، ۳۰ چنګاښ ، ۱۳۹۸ل)
د پاکستان سرحد ته نږدې د ایران د انقلابي ګارد پر غړو وسله وال برید شوی دی چې په نتیجه کې یې څلورو تنو ته مرګ ژوبله اوښتې.
د ایران دولتي تلویزون وايي چې په برید کې د ایران د انقلابي ګارد دوه غړي وژل شوي دي او دوه نور ژوبل دي.
اسوشیتډپرس د ایران د دولتي تلویزون په حواله ویلي دي چې برید وسلوالو کړی دی خو د کومې ډلې نوم یې نه دی اخیستی.
برید د شنبې په ورځ (جولاۍ۲۰) ناوخته د څاروان په سیمه کې شوی دی.
د فرانسې خبري اژانس بیا وايي چې په وژل شویو کسانو کې یې یو د انقلابي ګارد غړی محسن نقیبي او بل یې د بسیج په نامه د یوې سیمه ایزې ملېشې ډلې غړی عبدالخالق دیرازهي دي.
د ایران د سیستان او بلوچستان په ایالت کې تر دې مخکې هم وسله وال بریدونه شوي دي چې علت یې مذهبي خشونت او د نشه يي توکو د قاچاقبران یاد شوي دي.
ددې برید پړه تر اوسه ایراني چارواکو په کومې مشخصې وسلوالې ډلې نه ده اچولې، او نه یې هم چا مسئولیت منلی.
