غورځنګ
دا خو په ټوله نړۍ کې مشهوره خبره ده چې برتانيه د ټولو نړيوالو فسادونو مور ده او که ووايو چې په نړۍ کې د دسيسو او توطئو پيل، د بې ګناه مرګونو پيل، د هېوادونو بېلتون، د ملتونو او قومونو جداوالی، د اسلامي امت تر منځ د نفاق د تخم شیندل او نور اکثريت مسائل برتانيې پيل کړي دي او خصوصاً له هغه وخته چې برتاينه په نړۍ کې سوپر طاقت ګرځېدلې ده نو په ټوله نړۍ کې فسادونه او نورې ناخوالې اوج ته رسېدلي دي.
نو د موضوع اړوند بايد ووايو چې په افغانستان کې هم د پخوانيو او اوسنيو اکثريتو ناخوالو پيل برتانوي يرغلونو ايښی دی. دا چې برتانيې پر ګران هېواد باندې تقريباً درې ځله يرغلونه کړي دي خو بيا هم نه دي توانېدلي چې افغانستان ونيسي او خپل حاکميت پرې وچلوي، نو په دې اساس د خپل يرغليز فکر په اساس يې په افغانستان کې مختلفې ناخوالې رامنځته کړلې. چې دا دی د همدېوو ناخوالو له امله اوس هم افغان ولس کړېږي.
د برتانويانو تر ټولو لويه ناخواله او تخريب چې افغانستان پکې لا تر اوسه هم ښکېل دی، د نړيوالو او سیمه ييزو سيالانو تر منځ د جنګ ميدان ګرځېدل دي. او دا تخريب برتانوي جرنېلانو په دې اساس رامنځته کړی دی تر څو د روسانو هغه ادعا او دعوا چې دوی لرله او په ترڅ کې يې ځانونه ګرمو اوبو يعنې هند او اوسني پاکستان سيمو ته رسول غوښتل؛ په افغانستان کې پاتې کړي او دلته د روسانو د دغې دعوې مخه ډب کړي، چې دا دی ډب کړې يې هم ده، نو د دې لپاره برتانوي جرنېلانو افغانستان ته د بفر (حائل ياپردې) حيثيت ورکړ او د خپلو ځواکونو پواسطه يې د هند له سمندري مورګو څخه واخله او بيا تر طورخم پورې او ان له چتراله تر بدخشانه پورې سیمې ونيولې او ها خوا يا هم د دوی له نيولو څخه پاتې افغانستان يې د بفر په نامه ياد کړ او له روسانو سره يې بيا خبرې اترې روانې کړې، او په دې باندې روسانو او انګرېزانو سره اتفاق وکړ چې که د پاتې افغانستان په هره ساحه کې هر څه کېږي نو پر دوی يې څه؟؟!
همداشان بله د فسادونو لويه نښه او غميزه چې ډېورنډ لاين دی او د پښتنو قوم يې په دوو برخو وېشلی دی، چې اوس هم دا دی افغانان ورڅخه کړېږي. او دا دی که چېرته د کرښې په یوه غاړه کې جنګ وي نو بله غاړه هم ورسره پوره ناکراره وي. که چېرته يوه غاړه په امن او امان ژوند تېروي نو بله غاړه هم همداشان وي.
د برتانيې له پورتنيو لويو دسيسو پرته يوه بله دسيسه دا وه چې د افغانستان د ائينده او راتلونکي لپاره يې داسې پلان ترتيب کړ چې که چېرته په افغانستان کې هر يو واکمن واک ته رسېږي نو د دوی پلانونه به په نظر کې نيسي او د دوی اهداف به په افغانستان کې تحقق کوي. چې دا پروسه بيا له امير عبدالرحمن خان نه راواخله، د امير امان الله خان او ان تر ظاهرشاه او راوروسته واکمنيو پورې هم وغځېدله.
خو کله چې داود خان د سپينې کودتاه تر عنوان لاندې د ظاهرشاه پر ضد يوه کودتاه تر سره کړه نو خلکو د داودخان په راتلو سره داسې فکر وکړ چې ګواکې نور به نو برتانيې له پلانونو څخه خلاص شي او هغه ديموکراسي چې د پلي کېدلو لپاره يې د امان الله خان له او د ظاهرشاه د واکمنۍ پر مهال د سردار شاه محمود خان او نورو صدراعظمانو له لوري هڅې شوې وې، نور به پای ومومي خو خلک خبر نه وو چې دا ځل به نو تر ټولو له خونړي کمونستي انقلاب سره مخ کېږي. چې په ۱۳۵۷ هش کال کې د داود خان پر ضد يوه خونړۍ کمونستي کودتاه تر سره شوه او داود خان سره له ټولې کورنۍ پکې ووژل شو. دغه انقلاب چې پيل يې روسي زيره خورو کړی وو، بلاخره په خونړيو خپلمنځي جګړو پای ته ورسېدلو.
له دې وروسته کله چې د طالبانو تحريک رامنځته شو او د ملا محمد عمر مجاهد په لاسونو يې بنسټ کېښودل شو نو ايله افغانانو د موقت وخت لپاره د ارام ساه واخيستله خو دغه د ارام ساه ډېره لنډه وه او امريکا او ناټو په مختلفو بهانو پر افغانستان وحشيانه يرغل وکړ چې دغه يرغل يو ځل بيا د جنګېز خان تاریخ راژوندی کړ او ټولې اسلامي نړۍ ته يې وښودله چې که څه هم چنګېز خان او د ظلم دوره يې تېره شوې ده خو اوس يې هم لا پر پله روان خلک شته چې هماغسې او لا له هغه هم بدتر ظلمونه تر سره کړي.
دا چې د برتانويانو او روسانو د يرغلونو پر مهال هم په افغانستان کې د مخلتفو هېوادونو لاسونو ښکېل وو خو د امریکايانو له يرغل سره سم بيا نږدې د ټولې نړۍ د يرغلګرو هېوادونو لاسونه افغانستان ته را اوږده شول چې دا دی اوس د افغان ولس پر ضد هر هېواد په افغانستان کې ځانته انجيوز ګانې لري او خپل اهدافو ته ځان رسوي.
ان دا چې د سيمې او ګاونډ هېوادونه هم په افغانستان کې خپل خپل اهداف لټوي.
خو په پای کې بايد هر افغان په هېواد کې د اسلامي نظام د قيام دعا وکړي تر څو د تېر پنځه کلن دور په څېر يو ځل بیا افغانان په ازاده او اسلامي پاکه فضا کې خپل سپېڅلی ژوند تر سره کړي.
