(کابل ټکی کام، ۱۳۹۸، زمری ۱)
د بادغيس ولايتي شورا غړي وايي، په بالامرغاب ولسوالۍ کې د ملي اردو یو کنډک چې له څلور سوه زيات سرتيري پکې ميشت دي د طالبانو له خوا کلابند شوي دي.
د ولايتي شورا رئیس عبدالعزيز بيګ وايي، شاوخوا دوه مياشتې کيږي چې د ملي اردو یو کنډک طالبانو کلابند کړی زياتوي چې د طالبانو ګواښونه زیات شوي او له تيرې یوې اوونۍ راهيسې د ملي اردو هوايي ځواک نه دی توانيدلی چې کلابندو سرتيرو ته خوراکي توکي او مهمات ورسوي.
عبدالعزيز بيګ ، په بالامرغاب کې د هوايي بريدونو پر مهال لس د ښځو او ماشومانو په شمول د لس تنو ملکي وګړو د وژل کيدو خبر هم ورکړی دی.
په عين حال کې په ولسي جرګه کې د بادغيس د خلکو استازی ضياءالدين اکازی هم په دغه ولايت کې پر امنيتي وضعيت اندېښنه ښيي زياتوي که یادې مسئلې پاملرنه ونه شي نو بالامرغاب کې به انساني ناورین به رامنځته شي.
که څه هم د بادغيس والي عبدالغفور ملکزی دا نه مني چې بالامرغاب کې دي سلګونه د ملي اردو ځواکونه تر کلابندۍ لاندې وي خو د ځايي باوري سرچينو په وينا یوازې په تيرو پنځلس ورځو کې طالبانو په دغه ولايت کې زيات پرمختګ کړی، د دولتي ځواکونو پر مخ يې د ډيری ولسواليو لارې بندې کړي.
د يادونې ده، چې دوه اوونۍ مخکې د بادغيس په آبکمري ولسوالۍ کې کومانډو ځواکونه د طالبانو تر کمين لاندې راغلل چې پر مهال يې له پنځه ديرش زيات کومانډو عسکر ووژل شول او د هغوی وسلې د طالبانو لاسته ولويدې.
