څارنوال حشمت عبیدي
مونږ له کورنیو لاپوکانو یا ډوزمارانو تنګ و چې اوس ورپسې نړیوال ډوزمارانو هم سرونه راپورته کړل، د امریکا ولسمشر ډونالډ ټرمپ پرون له عمران خان سره په کتنه کې لومړۍ انټرنشنل ډوزه وویشته، او هغه دا چې ویې ویل: زه کولای شم افغانستان په لسو ورځو کې د نړۍ له نقشې محوه کړم!!!
په داسې حال کې چې هیوادوالو به د دغه انټرنشنل ډوزمار د سرتیرو تازه انځورونه لیدلي وي چې ان د قضای حاجت لپاره له خپل ټانک څخه له دیرې ویرې ښکته کیدای نشي بلکې له کړکۍ څخه خپل حاجت رفعه کوي، چې انځورونه یې همدا اوس هم په ټولنیزو رسنیو کې ښکته پورته کیږي.
بله خبره داده چې انټرنیشنل ډوزمار ته د افغانستان تاریخ هم معلوم دی او د هغو یرغلګرو تاریخ هم چې ورته وړاندوینې یې کړې وي او پر افغانستان یې د همدې لپاره یرغلونه کړي وو چې ګوندې افغانستان به ایل کړي او د تل لپاره یې د نړۍ له نقشې ورک کړي، خو برعکس یرغلګر د افغانانو د کلکو سوکانو له کبله ورک او افغانستان لا هم پر خپل ځای په خپل برم او عزت کې ولاړ دی:
لکه ونه مستقیم په خپل مقام یم
که خزان راباندې راشي که بهار
نن نه چنګیزخان شته او نه یې لښکرې یواځې نوم یې شته دا هغه چنګیز خان و چې پر افغانستان یې د افغانستان د ختمولو لپاره یرغل کړی وی.
نن انګریز شته خو د لندن تر پولو پورې محدود دی، او یواځې د شیطانت او رزالت ورته پاتې دی، نه یې هغه لښکرې شته او نه هغه برم چې د خیبرو په درو کې یې پر خلکو د کبر او غرور حکومت کاوه، خو افغانستان همغه افغانستان دی نه یې ایل کړای شو او نه یی ختم کړای شو، خو بر عکس دوی پخپله ختم او تر خاورو لاندې شول.
د شوري اتحاد نوم شته خو نه یې هغه برم شته او نه یې هغه لښکرې چې د افغانستان لویشت لویشت خاروه یې د افغانانو په وینو سره کړه. دا هغه شوروي و چې افغانستان وره یو وار نسوار هم نه ښکارید، خو دادی افغانستان شته او شوروي اتحاد په قبر کې ښخ دی او د افغانستان د ختمیدا ارمان هم ورسره یو ځای ښځ دی.
د امریکایی ښکیلاک دغه ورځې هم رالنډې ښکاري، ځکه چې پر افغانستان یې خپل ټول زور وازمایه، ورپسې یې د سولې او مذاکراتو لړۍ پیل کړه او بالآخره یې په ډوزو پیل وکړ او هغه هم بین المللي ډوزي، ډاډه یو چې ورپسې به یې د ځمکې له مخه د ورکیدا مرحله پیل شي.
دغه انټرنیشنل ډوزمار ته وایو چې که تاسې رښتیا هم دومره نران ویاست نو خپل هغه بندیان چې له طالبانو سره پراته دي خلاص کړئ بیا له هغې وروسته د افغانستان د ورکولو ډوزې وولئ
که ستاسې ډوزې په رښتیاو بنا وي نو ولې مو د طالبانو دروازې وټکولې او په خورا ذلت سره ورسره د سولې او د افغانستان څخه د خپلو فوځونو د ویستلو په خبرو مو میاشتې تیرې کړې؟
که تاسې ډوزماران رښتیا هم دومره اتلان ویاست نو بیا ولې کله یوه او کله بل ته عذر او زارۍ کوئ چې د افغانستان د جګړې په ختمولو کې درسره مرسته وکړي، چې له عمران نه مو تازه همدا غوښتنه یې غوره بیلګه ده.
په هر ترتیب
درنو هیوادوالو!
د انټرنیشنل لومړۍ ډوزه خو مو واوریده، منتظر اوسئ چې دوهمه ډوزه به یې کله او څه ډول وي.
او د ډوزو لړۍ یې ځکه پیل کړه چې لکه د سیلاب اخیستي هر ځګ ته یې لاسونه واچول خو له افغانستان نه د تیښتې لاره یې ونه موندله، اوس هڅه کوي چې که وکولای شي د ډوزو له لارې له افغانستان نه پښې سپکې کړي او په خوندي توګه ووتلای شي.
خو د انټرنیشنل ډوزمار دا ډوزه ډیری هغو چارواکو ته د سرټیټۍ ځای دی چې بالآخره یې بادار د افغانستان د ختمولو او له مینځه وړلو او د لس ملیونه وګړو د وژلو ډوزګواښونه کوي خو دوی د غلامانو په څیر تر اوسه پورې چُپه خوله دي.
شرم شرم شرم
