(کابل ټکی کام، ۱۳۹۸، زمری ۱)
ایراني چارواکي پرون ادعا وکړه چې په خپل هيواد کې يې اوولس تنه هغه کسان نيولي چې سي آی ای ته يې کار کاوه خو ټرمپ دغه ادعا رد کړې ده.
د ایران د استخباراتو د وزارت یوه لوړپوړي چارواکي خبري غونډې ته ويلي و چې په یادو کسانو کې ځينې يې مخکې تر مخکې په اعدام محکوم شوي خو ټرمپ د امريکايي جاسوسانو نيول رد کړي او دا يې د ایران د درواغو دعوه بللې ده.
ایراني رسنيو د ځينو کسانو انځورونه هم خپاره کړي چې په وينا يې د سي آی ای د افسرانو دي او په ایران کې يې د ننه جاسوسي کوله.
ټرمپ په خپله ټويټر پاڼه ليکي، لکه د بې پيلوټه الوتکې د ويشتلو په څير دا هم درواغ او پروپاګند دی.
له بله پلوه د امریکا د بهرنيو چارو وزير مايک پامپيو هم د نيول شويو کسانو په اړه شک څرګند کړی وايي، د ايران رژيم په درواغو ويلي کې مخينه لري.
ایران تر دې مخکې هم امریکا او اسرائيلو ته د جاسوسۍ په تور ځينې کسان نيولي او آن اعدام کړي هم دي.
د امریکا ولسمشر تير کال ایران سره د ۲۰۱۵م کال له اټمي تړونه ووت او پر دغه هيواد يې بنديزونه ولګول چې له هماغې راهيسې یو بل ته ګواښونه کوي خو تر اوسه يې د يو بل پر وړاندې د عملي پوځي اقدام هڅې نه دي کړي.
