(کابل ټکی کام، ۱۳۹۸، زمری ۵)
د امریکا د مرکزي استخباراتو پخوانی مرستيال مایکل مورل وايي، چې طالبانو سره روان مذاکرات یواځې يوه لوبه ده او امریکا له افغانستانه د خپلو ځواکونو د وتلو په هڅه کې ده.
د مورل په وينا، ډونالډ ټرمپ غواړي چې څومره ژر کيدلای شي طالبانو سره د سولې هوکړه وکړي خو په وينا يې تمه نشته چې دا سوله به سوله شي.
د مورل په خبره، ټرمپ وايي چې طالبان ستومانه شوي، خو دا سمه نه ده ځکه چې طالبان د ټول افغانستان د ادارې د کنترول په هڅه کې دي زياتوي:”د سپتمبر له يوولسمې پيښې وروسته طالبان د بل هر وخت په پرتله د افغانستان پر زیاته سيمه واکمن دي، هغوی د ټول افغانستان د کنترولولو اراده لري”.
نوموړی وايي، که څه هم طالبان ژمنه کوي چې د سولې هوکړې وروسته به افغانستان کې ترهګرو ډلو ته ځای ورنه کړي خو په وینا يې کیدلای شي چې دغه هيواد کې يوځل بيا القاعده سر راپورته کړي.
امريکايان له تيرو څو مياشتو راهيسې طالبانو سره د سولې په خبرو بوخت دي څو له دغه هيواده خپل ټول پوځونه اوباسي.
د طالبانو او امريکا تر منځ اووه ځلې مذاکرات شوي چې د دواړو غاړو په وينا پرمختګونه پکې شوي او یوې پایلې ته نږدې شوي دي.
په قطر کې د طالبانو د سياسي دفتر وياند سهيل شاهين په تازه مرکه کې ويلي، که چيرې امریکا یو قانع کوونکی وړانديزوکړي نو ډير ژر به د سولې موافقه مکمله شي.
