(کابل ټکی کام، ۱۳۹۸، زمری ۵)
د دایکندي ولايت کجران او ناوه میش ولسواليو کې پر امنيتي پوستو طالبانو برید کړی چې د چارواکو په وينا اوولس عسکرو ته يې مرګ ژوبله اړولې ده.
سيمه ييز چارواکي وايي، په دغه بريدونو کې لس عسکر وژل شوي او اووه تنه نورټپيان دي.
د دایکندي د والي ویانده سکينه احساني وايي، طالبانو تيره شپه دولس بجې د یادې ولسوالې اړوند په سنګ سياه او د کجران پر ګډه قرارګاه برید کړی چې تر سهاره پورې دوام درلود.
له تيرې یوې نيمې مياشتې راهيسې د کجران ولسوالۍ په مربوطاتو کې پر دولتي پوستو د طالبانو بريدونه زيات شوي چې د امنيتي سرچينو په وينا په دغه موده کې نږدې سل سرتيرو ته مرګ ژوبله اوښتې ده.
د دایکندي د ولايتي شورا غړي وايي، تر دې مخکې يې څو ځلې په کجران او ناوه ميش ولسواليو کې د طالبانو د ګواښونو او بريدونو په اړه مسؤولين خبر کړي خو دسکینه احساني وايي تر اوسه د دغه موضوع په اړه مثبت اقدامات نه دي شوي.
طالبان هم مني چې په ياده سيمه کې يې پر پوستو بريدونه کړي وياند يې ذبیح الله مجاهد په خپله رسمي ټويټرپاڼه ليکي، طالبانو څلور پوستې نيولي، لس عسکر وژل شوي، او پنځه نور ټپيان دي.
طالبانو په وروستيو کې د هيواد په بیلابيلو سيمو کې خپلو بريدونو ته زور ورکړی او د پوځي مرکزونو تر څنګ يې له دولتي ځواکونو ولسوالۍ او ډيری سيمې تر خپلې ولکې لاندې راوستي دي.
