(کابل ټکی کام، ۱۳۹۸، زمری ۸)
د کندهار ولايت په سپين بولدک بازار کې د چاودنې له امله درويشت کسانو ته مرګ ژوبله اوښتې ده.
د کندهار د والي ویاند بهير احمدي وايي، چاودنه نن سهار د سپين بولدک په ګنج سيمه کې رامنځته شوې ده.
د احمدي په وينا، دغه چاودنه په موټرسيکل کې د چاوديدونکو توکو د چاودنې له کبله شوې چې په ترڅ کې يې درې تنه ملکي وګړي وژل شوي او شل نور ټپيان دي.
د پيښې ټپيان د سپين بولدک ولسوالۍ او کندهار ښار روغتونونو ته د تداوۍ لپاره وړل شوي دي.
تر اوسه د چاودنې مسؤوليت چا په غاړه نه دی اخيستی.
