کابل ټکی کام (یکشنبه ، ۱۳ زمری ، ۱۳۹۸ل)
مشهور امریکايي سیاسي مبصر، مایکل کوګلمېن، لیکي د امریکایانو او طالبانو خبرو دومره پرمختګ کړی دی چي فقط څو میاشتې مخکې یې چا تصور هم نه سوای کولای. خو د سولي ټوله پروسه د طالبانو له مزاج او خوښي سره سمه روانه ده.
مایکل زیاتوي، طالبانو غوښتل چې یوازې امریکا سره خبرې وکړي، او همدا وسوه. هغوی غوښتل چې لومړی موافقه وسي، او بیا اوربند وسي، تر اوسه پوري همدا کیسه روانه ده. هغوی افغان دولت سره من حیث النظام خبرې نه کولې چې امریکایانو یې خبر ومنله.
مایکل لیکي، موږ باید تعجب و نه کړو، ځکه طالبان له اوله سره خبرو ته له قوي موقفه ور داخل سول. نو لهذا، د مانورې لپاره زیاته ساحه لري. طالبان د موافقې د تر لاسه کولو لپاره عجله نه لري، خو امریکایان په بېړه کي دي.
مایکل کاږي هیڅوک باید مذاکراتو ته له کمزوري موفقه ور داخل نه سي، خو واشنګټن بله چاره نه لري ځکه چې ددې جګړې دپای لپاره امریکا دې کار ته مجبوره کړل سوه.
مایکل وړاندې لیکي، د سولي د پروسې اټکل ګران دی، ځکه د طالبانو سره سوله سابقه نه لري. موږ ښايي یوې موافقې ته ور نژدې سوي یو، خو دې معاملې زیات لاینحله سوالونه، ابهامات، او ریسکونه راپورته کړي دي.
سیاسي مبصرین اونړیوالې رسنۍ داسې مهال دطالبانو برلاسي په ګوته کوي چې دا دواړه متقابل جهتونه داتم برخلیک ټاکونکي پړاو لپاره سره ناست او هیله ده چې له توافق نامې وروسته امریکایان په عاجله توګه ووزي ترڅو دافغانانو ترمنځ دباور فضا رامنځته کړي.
