کابل ټکی کام (سه شنبه، مرغومی ۲۹مه، ۱۳۹۴ ل):
د افغان ملي پوځ یو لوړپوړي چارواکې خبرداری ورکړی، چې طالبانو او یو شمېر نورو کړیو بیا هلې ځلې پيل کړي، چې کندوز یو ځل بیا د حکومت له ولکې څخه وباسي .
جنرال مراد علي مراد د ملي پوځ جګ پوړی جنرال دی، چې د کندوز ولایت امنیتي وضعیت له ارزونې وروسته دغه څرګندونې کړي.
جنرال مراد علي مراد، د سپټمبر په میاشت کې د کندز بېرته نيولو عمومي قومنده په غاړه لرله، له عملیاتو وړاندې يې ګواښ کړی وه، چې طالبان به د کندز ولایت نه وشړي او د هغوي خپلوان او خواخوږي به په سختې سره وځپي.
د کندز له سقوط وروسته یو شمېر چارواکي په دې ګمان وه، چې د حکومت په چوکاټ کې یو شمېر داسې کړۍ شته چې د کندز سقوط ته يې لاره اواره کړې وه، نو له همدې امله دولت یو ځانکړی کمیسیون وټاکه ترڅو وڅېړي چې د کندز د سقوط لامل څه وه، د کمیسیون له ارزونې وروسته د ولسمشر غني له لوري یو شمېر چارواکي له دندو ګوښه شول .
مراد دکندز په ښارکې دننه په یو شمېر کسان چې نومونه يې ونه ښودل، تور پوري کړ چې اوس هم طالبانو سره پټې مرستې کوي او له دولت څخه يې غوښتنه وکړه چې داسی خلک مجازات کړي.
جنرال مراد وويل مونږ نشو کولی چې د دغو اشخاصو د هویت په اړه څرګندونې وکړو، خو د پوځ قومندان «محي الدين غوري » ته مو د هغوي د تعقیب په اړه دنده ورکړې، چې څارنه يې وکړي
نوموړي په خپلو خبرو کې داهم وویل چې اوس کندز د خطر په سره کرښه ولاړ دی، لرې پرتې سیمې خو پخوا د طالبانو په واک کې وې اوس د ښار په ځيني برخو کې هم خپل فعالیتونه کوي.
سلیم بریال
