(کابل ټکی کام، ۱۳۹۸، وږی ۴)
طالبانو په افغانستان کې د سلام پر مخابراتي شبکې فعاليت بند کړی په وينا يې یادې مخابراتي شبکې ته يې څو ځلې خبرداري ورکړي خو د دوی له اصولو سرغړونه کوي.
د طالبانو د مؤسسو او شرکتونو د کنترول او تنظيم کمېسيون له خوا په خپره کړې اعلاميه کې د سلام مخابراتي شبکې مرکزونه او ټاورونه د نظامي هدف په توګه اعلان کړي په وينا “کوم فایبر چي د انټرنیټ لپاره دغه شرکت تر ځمکه لاندې غځولی قطع کېږي، له پرسونل، وسائلو او وسائطو سره به يې د استخباراتي ارګان سره تړلو کسانو او اجناسو په څیر چلند کېږي او که يې له چا سره سيم کارډ پیدا شي قانوني چلند به ورسره کېږي”
تر دې مخکې هم طالبانو ويلي چې امريکايان او استخبارات په شپنيو چاپو او ډرون بريدونو کې په افغانستان کې د ځينو مخابراتي شبکو څخه ګټه پورته کوي.
طالبانو ولې د سلام مخابراتي شبکې پر فعاليتونو بنديزونه لګولي دي.
طالبانو په تازه خپره کړې اعلاميه کې پر سلام مخابراتي شبکې د فعاليت د بندولو ځينې لاملونه ښودلي زياتوي چې یاده شبکه د کابل ادارې او امريکايانو لپاره استخباراتي فعاليت ترسره کوي، د همدې هدف لپاره له مخابراتي تماسونو پټ معلومات ټولوي او اړوندو استخباراتي شبکو ته يې په لاس ورکوي.
دغه راز طالبان وايي، چې سلام مخابراتي شبکه ولسي خلکو او مجاهدينو ته د یقيني خطر د پيښېدو پر وخت د یاد کمېسيون له اصولو سرغړونه کوي او ګډو ځواکونو جاسوسي کوي.
