کابل ټکی کام( دوشنبه، ۴وږی، ۱۳۹۸)
اجرائیه رئیس ډاکټر عبدالله عبدالله د ګډو ځواکونو لخوا په نظامي او شپنیو عملیاتو کې د ملکي تلفاتو د زیاتوالي پخلی کړی دی.
ډاکټر عبدالله ویلي چې د ملکي خلکو ژوند ته باید زیاته توجه وشي او له امنیتي ادارو یې غوښتنه کړې چې د دې مخنیوی وکړي.
نوموړي ویلي چې په دې وروستیو کې دغه چاره ډیره شوې او د ګډو ځواکونو په عملیاتو کې ملکیانو ته زیات تلفات اوړي چې د ده په ټکو دا خواشینونکې ده.
ده دا خبرې نن د وزیرانو شوری په عمومي غونډه کې کړي دي.
اجرائیه رئیس دا څرګندونې په داسې وخت کې کوي چې وړمه شپه هم په لوګر ولایت کې ګډو ځواکونو په یوه کور چاپه اچولې وه او د کور دوه تنه غړي یې د کور په انګړ کې په ماین الوزولي وو.
په دې څو اونیو کې دا څووم ځل دی چې دغه شان عمل ترسره کیږي چې ترتولو خونړۍ پیښه یې د پکتیا د زرمت وه چې د اختر په شپه یې کابو ۲۰ تنه د مکتب استادان، محصلین، دهقانان او نور عوام ووژل.
