کابل ټکی کام (۱۳۹۸، وږی ۱۳، چهار شنبه)
د امريکا په الاباما ایالت کې یوه څوارلس کلن هلک د خپلې کورنۍ پر غړو ډزې کړي چې پنځه تنه پکې وژل شوي دي.
پوليس وايي، دغه هلک د خپل پلار له وسلې سره لوبې کولې چې ناڅآپي ډزې شوي او پکې يې میره، درې خويندې او یو ورور وژل شوي دي.
پوليس وايي، دغه کوچنی هلک له څارنوالانو سره د یادې پيښې د رامنځته کيدو په څرنګوالي کې مرسته کوي.
وړمه شپه هم د تګزاس کې په یوه وسله وال بريد کې چې د ۳۶ کلن نارینه له خوا ترسره شو اووه تنه ووژل شول او یو شمير نور کسان پکې ټپيان شول.
شاوخوا یوه میاشت مخکې هم په تګزاس کې په یوه وسله وال بريد کې ۳۱ کسان وژل شوي و او لسګونه نور ټپيان و.
په وروستيو کې په امريکا کې وسله وال بريدونه زیات شوي او په بريدونو کې د وژنو د معلوماتو راټولونکې اداره وايي، چې په تيرو اتو مياشتو کې د وسله والو بريدونو له کبله درې سوه کسان وژل شوي او په همدومره شمير کې نور ټپيان شوي دي.
