روسيې یو ځل بيا؛ د امريکا او طالبانو تر منځ د سولې تړون تضمين ته چمتووالی وښود
(کابل ټکی کام، ۱۳۹۸، وږی ۱۴، پنج شنبه)
روسيې یو ځل بيا ويلي، چې دوی چمتو دي څو د امريکا او طالبانو تر منځ د سولې تړون ضمانت وکړي.
دا څرګندونې پرون چهارشنبه د روسيې د بهرنيو چارو وزارت وياندې ماريا زخرووا یوې خبري ناستې ته وکړې.
زخرووا وويل، روسيه له خپل اړخه چمتوو ده څو د یاد تړوند پلي کيدو په برخه کې د یوه ضامن په توګه رول ولوبوي.
تر دې مخکې هم روسيې د طالبانو او امريکا تر منځ د سولې تړون ته د ضامن په توګه د چمتووالي غږ کړی و او وړمه ورځ د دغه هيواد د بهرنیو چارو مرستیال وزير ایګور مورګلوف ویلي و، امريکا او طالبان په دې ټينګار لري چې روسيه دې د سولې تړون پر مهال په رسمي بڼه حضور ولري.
نوموړي ويلي و چې د دغه تړون پر مهال به نه یوازې روسيه بلکې ځينې نور هيوادونه هم شتون ولري.
درې ورځې مخکې د امريکا د بهرنيو چارو وزارت ځانګړي استازي زلمي خليلزاد ويلي و چې طالبانو سره يې هوکړه بشپړه کړې، یوازې د ټرمپ لاسليک ته انتظار دی چې نوموړی پر دغه هوکړه لاسليک وکړي.
دا مهال د افغان سولې لپاره د امريکا استازی خليلزاد په کابل کې دی او له افغان حکومتم سره پر سلا مشورو بوخت دی.
تيره ورځ امریکايي ټایم مجلې په یوه مطلب کې ليکلي و چې یاد تړون اشرف غني قبول کړی، د خلیلزاد او غني ترمنځ پرې غالمغال هم رامنځته شوی او خليلزاد ورته ويلي چې له مجبورۍ دغه تړون مني ځکه چې افغان حکومت جګړه بايللې ده.
د سولې په برخه کې د امریکا استازي زلمي خليلزاد ويلي، پر یادې هوکړې د ټرمپ له لاسليک وروسته به عملي چارې پيلېږي او په ۱۳۵ ورځو کې به له پنځو اډو څخه ۵۴۰۰ امريکايي پوځيان له افغانستانه ايستل کيږي.
