ډاکټر یوسف اکبری
دتيرې ميلادې پيړۍ دپنځوسمو په لومړيو کې چې کله دسخت مرګ ژوبلې سره دمخامخ کيدو له امله امريکا د ويتنامي انقلابيانو سره دخبرو اترو فيصله وکړه، نو دهغوى څخه يې وغوښتل چې دجنګ د ختمولو په خاطر دې دخبرو لپاره خپل هيئت پاريس ته راوليږي، انقلابيانو خپل څلور کسيز هيئت دوه سړي او دوه ښځې وليږلې.
امريکايي استخباراتو ددغه هيئت دهستوګنې لپاره دپاريس په قيمتي هوټل کې ځاى ونيو او دراحت او آرام ټول وسائل يې ورته برابر کړل، کله چې هيئت دپاريس د اورلي هوايي ميدان ته ورسيد، نو لکس موټران يې په انتظار ولاړ وو، تر څو هيئت د هستوګنې ځاى ته ورسوي، خو هيئت پدغه موټرو کې دسپريدو څخه انکار وکړ او دميدان څخه يې په خپله خوښه د وتلو غوښتنه وکړه او دا چې په ټاکلي وخت به دخبرو مجلس ته حاضريږي.
امريکايي هيئت پدې کار حيران شو او پوښتنه يې وکړه، نو چيرې به اوسيږئ، دويتنامي هيئت مشر جواب ورکړ، دپاريس په يوه ناحيه کې د يو ويتنامي محصل سره، امريکايي ورته وويل، مونږ ستاسو لپاره په يو لوى هوټل کې د آرام ځاى بندوبست کړى دى، ويتنامي جواب ورکړ، مونږ ستاسو سره دجنګ په وخت کې په غرونو کې اوسيدو، په تيږو ويده کيدو او واښه مو خوړل، اوس که مو طبيعتونه بدل شو، ويريږو چې ضميرونه مو بدل نه شي، نو مونږ خپل کار ته پريږدئ.
ويتنامى وفد په خپله مخه لاړ او دويتنامي محصل سره يې واړول او په ټاکلي وخت به د خبرو غونډو ته راتلل، چې ددغه خبرو په پايله کې امريکايان له ويتنام څخه ووتل.
څوک چې خپل ضمير خرڅ کړي، هغه خپل وطن خرڅوي، انسان د زړه په مصنوعي رګونو او په نيم شش ژوندى پاتې کيدى شي خو په نيم ضمير کله هم ژوند نه شي کولى.
زمونږ چارواکي دخارجي سفرونو په خاطر د يو بل سره سيالي کوي، تر څو سفريه ترلاسه او چکر ولګوي، خو په سفرونو کې په وخت مجلسونو ته نه ورځي او که ورشي، ويده وي، ځکه دوى شپه په خپله طريقه نه بلکه دهغوى په طريقه روڼوي.
