زابل: کلات ښار کې د ملي امنیت پر مرکز موټربم برید شوی
(کابل ټکی کام، ۱۳۹۸، وږی ۲۸، پنجشنه)
نن سهار د زابل مرکز کلات ښار کې د ملي امنیت پر رياست موټربم بريد درنه مرګ ژوبله اړولې ده.
د زابل والي رحمت الله يارمل د لس کسانو د وژنې او نوي کسانو ټپي کيدل تاييد کړي دي.
خو د زابل د ولايتي شورا رئيس عطاجان حق بیان وايي، تر دې دمه د پيښې له ځايه د شل کسانو مړي او پنځوس تنه ټپيان روغتون وړل شوي دي.
د پيښې ځای ته نږدې سرچینې وايي، په بريد کې د ملي امنیت رياست ودانۍ په بشپړه توګه ویجاړه شوې او لا هم د امنیت کارمندان تر خاورو لاندې دي.
د چارواکو په وینا، د چاودنې پر مهال د امنیت سره نږدې د ولايتي روغتون ودانۍ ته هم زیان اوښتی دی.
طالبانو د بريد مسؤولیت منلی وياند يې ذبیح الله مجاهد په خپله رسمي ټويټرپاڼه لیکي، په برید کې د استخباراتو ودانۍ ويجاړه او ګڼ شمير د امنیت ملي افسران، عسکر او کارمندان وژل شوي او ټپيان دي.
نوموړی وايي، په دې اړه به وروسته رسنيو سره جزیات شريک کړي..
