حنیف اتمر؛ راتلونکو ټاکنو سره پرېکون اعلان کړ
کابل ټکی کام (سه شنبه، ۱ تله ، ۱۳۹۸ل)
راتلونکو ولسمشریزو ټاکنو ته نوماند او د هېواد د ملي امنیت پخواني سلاکار حنیف اتمر راتلونکو ټاکنو کې دنه ګډون او پرېکون اعلان وکړ.
د نوموړي له دفتره په خپرې شوې خبرپاڼه کې ویل شوي، که ټاکنې وځنډول شي، نو دی به د خپلې نوماندۍ حق خوندي وساتي.
د نوموړي د نوماندۍ د حق ساتنې مانا دا ده چې که ټاکنې د تلې په شپږمه نېټه ترسره کېږي نو دی پکې ګډون نه کوي.
اعلامیه کې راغلي، اتمر به په راتلونکو ټاکنو کې بې طرفه پاتې شي او د هیڅ بل نوماند ملاتړ به ونه کړي.
نوموړی په ټاکنو کې د نه ګډون پرېکړه په داسې حال کې کوي چې پرون د پخواني ولسمشر حامد کرزي په ګډون یو شمېر نورو پېژندل شویو سیاسي څېرو هم د راتلونکو ټاکنو د ځنډولو غوښتنه کړې وه او زیاته کړې یې وه چې په اوسنیو شرایطو کې د رڼو ټاکنو ترسره کېدل ستونزمن دي، نو باید ټول پام سولې ته واړول شي.
دیادونې وړ ده چې دټاکنو په اړه لا وار د مخه د فساد او درغلیو راپورونه ورکړل شوي، تېره ورځ امریکا سفارت هم له بعضو شکایاتو وروسته په دې اړه اندیښنه څرګنده کړې وه، او نوماندان یې دقانون منلو ته رابللي وو.
