پرون د شنبې په ورځ د کابل د ادارې مشر اشرف غني د افغانستان لپاره د رياست جمهوري د انتخاباتو ورځ ښودلې وه او په څنګ کې يې ورسره دا ويلي وو، چې ګواکې دا ځل به داسې تاريخي انتخابات وي چې په تېرو کې کلونو که به ساری ونه لري.
خو دا چې ولس ورسره ولې او څنګه پرېکون کړی؟ نو ټولو ته معلومه ده چې د کابل ادارې په دې وروستيو کې پر عام افغان ولس څومره وحشتونه او چاپې پيل کړې وې، او څومره عام وګړي يې په شهادت ورسول، د عامو وګړو ناموسونه یې ولوټل، دوکانونه يې ورته ونړول، د شپنيو چاپو په ترڅ کې به يې پر عام افغان ولس باندې ډول ډول ظلمونه کول او له هېڅ ډول ظلم څخه به يې هم درېغ نه کاوه.
نو ځکه خو ولس فکر وکړلو چې د کابل اداره د افغان ولس هېڅ ډول ارزښتونو ته هم ژمنه نه ده بلکې ازښتونه يې لوټي او ورځ تر بلې پرې بدتري راولي.
بلخوا بيا د طالبانو هغه خبرداری چې عام افغان ولس ته يې ورکړی و او ورته ويلي يې وو چې د انتخاباتو په امریکايي پروژه کې ګډون مه کوئ! ځکه چې دا يوه بې معنا او بې مفهومه پروسه ده، ستاسو رائيه هېڅ ګټه نه لري، بلکې هغه څوک به واک ته رسول کېږي چې امریکا ته خوښ او قبول وي.
دغه پروسه که څه هم د افغان دولت له لوري يو بريالۍ پروسه ارزول شوې وه، خو نړيوالو او افغان رسنيو په یوه خوله يوه ناکامه پروسه وبلله او د دې پروسې د ناکامۍ په اړه يې مختلف ثبوتونه او دليلونه پېش کړل.
خو دې ته راځو چې دغه ټاکنې به د افغان ولس کوم درد دوا کړي؟؟
بايد ووايو چې افغان دولت چې تقريباً د منځته راتګ يې اتلس کاله خوا او شا کېږي، نه خو يې افغان ولس ته کوم د پام وړ کار کړی دی او نه يې هم د افغان ولس کوم درد دوا کړی دی.
افغان ولس چې تقريباً له څو لسيزو راهيسې پرې تپل شوې جګړه روانه ده، په هر صورت غواړي چې له دغې جګړې څخه ځانونه وژغوري او خپل ځانونه ترې وساتي، خو افغان دولت د دې پر ځای چې د ولس ارمانونو ته د عمل جامه ورواغوندي؛ بلکې برعکس له خپل ولس سره د امريکايانو په خوښه د دښمن په څېر چلند کوي، او تل يې د امریکايي ګټو لپاره وژني، د په شپنيو چاپو کې يې مقدسات توهينوي، اقتصادي منابع يې له منځه وړي، کوچنيان او ښځینه يې په شهادت رسوي.
نو له دې امله افغان ولس د حکومت دغو کړنو له انتخاباتو څخه بې زاره کړ او فکر يې وکړ چې دا دولت خو هسې هم د ولس په کيسه کې نه دی او هغه څه غواړي او کوي يې کوم څه چې امريکا غواړي، نو راځئ! چې پرېکون ورسره اعلان کړو.
نو هماغه و چې د هېواد له تقريباً ۳۸ ميليونه نفوس څخه يوازې يو ميليون کسانو رائيه وکاروله چې هغه هم په ټوله معنا د حکومتي ادارې واړه او لوی چارواکي دي.
تر ټولو ړومبی دا چې دغه انتخابات خو د هېواد په محدودو ساحو کې تر سره شوي دي، نو افغان ولس به څنګه پرې اعتبار ولري؟؟ او يا به هم د افغان ولس کوم درد دوا کړي؟؟
بل دا چې دغه انتخابات چې د هېواد په کومه ساحې کې هم تر سره شوي دي. خلک ورڅخه زيات شکايات لري، چې پخپله د انتخاباتو کمېسيون وويل چې تقريباً تر ۲۰۰۰ پورې شکایات مو د انتخاباتو په تړاو ثبت کړي دي.
همدارنګه کله چې انتخابات ترسره کېدل نو رائيه ورکوونکو ډېر زيات شکايات درلودل، ځینو ويل چې په پلانکي مرکز کې له ولسمشر غني پرته بل چاته رائيه نشو ورکولی، ځينو به ويل چې په پلاکي مرکز کې يې د رائيې لپاره ثبت نام کړی و خو اوس يې په هغه مرکز کې نوم نشته،
دغه شان ځينو به ويل چې نوم يې چې په کوم مرکز کې ثبت کړی دی، هغه مرکز يې بل مرکز ته لېږي او هغه بل يې بيا بېرته دوی ته راولېږي.
نو په داسې حال کې چې انتخابات له دومره درغليو ډک وي، هغه به د ولس کوم درد دوا کړي؟؟
