ايران: امریکا او متحدینو يې افغانستان د مخدره توکو د تولید ځاله ګرځولې
(کابل ټکی کام، ۱۳۹۸، تله ۱۰، چهارشنبه)
ايران وايي، چې امریکا او متحدانو يې افغانستان د مخدره موادو د تولید ځاله ګرځولې او د پخوا په پرتله پنځوس سلنه د مخدره توکو تولید زیات شوی دی.
دا څرګندونې د شانګهای سازمان غړو هېوادونو اوولسمې ناستې پر مهال په قرغستان کې د ايران لوي څارنوال محمد جعفر منتظري کړي دي.
منتظري د ملګرو ملتونو د جرمونو او مخدره توکو د مخنیوي څانګې د راپور په حواله ويلي، چې په افغانستان کې دامریکا او نړیوالو له حضور مخکې ۲۰۰ ټنه ترياک تولید شوي و او د دوی په راتګ سره دغه کچه ۱۰۰۰۰ لس زره ټنه ته رسيدلې ده.
د منتظري په خبره، د نړیوالو په موجوديت کې پنځوس سلنه د مخدره توکو توليد زيات شوی او بهرنیانو افغانستان د مخدره موادو په ځاله بدل کړی دی.
نوموړی زياتوي، نه یوازې دا چې بهرنيان د مخدره توکو د تولید په مخنیوي کې پاتې راغلي بلکې د دولت له خوا د مخدره توکو د مخنيوي هڅو مخه يې هم ډپ کړې چې له کبله يې ايران او ګاونډیو هیوادونو ته هم زيانونه اوښتي دي.
که څه هم امريکا ادعا کوي چې افغانستان کې يې د مخدره موادو د توليد په مخنیوي کې شاوخوا سل ميليارده ډالره لګولي خو د څارونکو بنسټونو په وينا افغانستان ته د امریکا په راتګ په هیواد کې د ترکيانو او مخدره توکو توليد او قاچاق نږد اويا سلنه زيات شوی چې په لوړه سطحه يې په قاچاق کې بهرنيان او لوړپوړي دولتي چارواکي ښکيل دي.
