کابل ټکی کام (دوشنبه، ۲۲ تله ، ۱۳۹۸ل)
د امریکا ولسمشر ډونالډ ټرمپ نن په یوشمېر ټوېټونو کې دسوریې په اړه ویلي، نه غواړي هغې جګړه کې ځان ښکېل کړي چې د دوو ملتونو ترمنځ یې شاوخوا ۲۰۰ کاله دوام پیدا کړی دی.
هغه پر خپل ټویټر تازه ټویټونو کې زیاته کړې، ترکیې سره جګړه نه کوي خو سختو بندیزونو ته دې انتظار وکړي.
د نوموړي له دې ټویټ سره د ترکيې د پولي واحد (لیرې) ارزښت هم پام وړ ټیټ شوی دی.
نوموړي ویلي، کردیانو یو شمېر بندیان ازاد کړي او ښایي د هغوی موخه دا وي چې دوی هم په دې جګړه کې دخیل کړي خو دوی نه غواړي په یوه ناپایه جګړه کې ښکېل شي.
دا په داسې حال کې ده چې د سوریې پر راس العین ښار د ترکي ځواکونو تر کنټرول وروسته کردیانو وویل، دوی نور د داعشي جنګیالیو د ساتلو مسوولیت نه لري.
دکردي ملېشو او ترکي پوځونو ترمنځ روانه جګړه وروسته له هغه خونړۍ شوه چې امریکایي ولسمشر له یاد هېواد څخه دخپلو سرتېرو دوتلو امر وکړ، دې جګړې اوس یو خونړی شکل غوره کړی، دواړه خواوې یو بل ته دتلفاتو اړولو ادعا کوي.
