کابل ټکی کام ۲۰وږی/۱۳۹۴
راپور: قدرت الله حسین
راپورونه وايي، چې وسله والو مخالفينو تېره شپه ناوخته د بدخشان ولايت راغستان ولسوالۍ نيولې ده.
د بدخشان د ولايتي شوری غړي جاويد مجددي منلې ده، چې ولسوالۍ د طالبانو له لوري نيول شوې ده او امنيتي ځواکونه تښتېدلي دي.
نوموړي زياته کړې ده، چې طالبان له اوږدې جګړې وروسته د ولسوالۍ د مرکز په نيولو وتوانېدل.
هغه د نښتې د مرګ ژوبلې په اړه کره مالومات نه دي ورکړې او په وينا يې وروسته به په دې اړه وغږېږي.
وسله والو طالبانو تېره ورځ د دې ولسوالۍ لسګونه کلي نيولي وو، چې له امله يې د راغستان چارواکو پر لوړو امنيتي کسانو د بېړنۍ مرستې غږ وکړ، خو طالبان پای هم د ولسوالۍ په نيولو وتوانېدل.
خو د بدخشان د امنيه قوماندانۍ مطبوعاتي دفتر بيا وايي، چې ولسوالۍ ته يې تازه دمه سرتېري هم استولي دي او له طالبانو سره خونړۍ جګړه نښتې ده.
طالبانو لا تر اوسه د پېښې په اړه خپلې خبرې نه دي کړي.
