کابل ټکی کام (پنجشنبه، ۲۵ تله ، ۱۳۹۸ل)
دپاکستان دجمیعت علمای اسلام ګوند مشر، مولانا فضل الرحمن دیاد هېواد له لومړي وزیر عمران خان څخه داستعفا غوښتنه کړې ده.
مولانا ویلي، څو پورې چې عمران خان استعفا نه وي کړې تر هغو پورې له حکومت سره هیڅ ډول خبرې اترې نه کوي.
مولانا زیاته کړې، د عمران خان تر مشرۍ لاندې اوسنی حکومت په درغلۍ جوړ شوی دی او څو پورې چې یې دا حکومت نه وي نسکور کړی تر هغه پورې هیڅ ډول مذاکرات نه کوي.
بلخوا د پاکستان د بهرنیو چارو وزیر شاه محمود قریشي ویلي، د دفاع د وزیر پرویز خټک په مشرۍ یوې کمېټې ته دنده سپارل شوې څو له مولانا سره خبرې وکړي.
قریشي زیاته کړې، تحریک انصاف سیاسي ګوند دی او د هر ډول سیاسي معاملو پر حل پوهېږي.
هغه زیاتوي، دوی هڅه کوي له فضل الرحمن سره ټول مسائل د خبرو له لارې حل کړي.
دیادونې وړ ده چې مولانا فضل الرحمن به داکتوبر په ۲۷ مه دپاکستان پلازمینې اسلام آباد ته دازادۍ ترنام لاندې یو لوی لاریون تنظیم کړي، او نوموړی به ددې فشار له لارې حکومت دخپلو غوښتنو منلو ته اړ باسي.
