طالبان: اشغال او دوه سری حکومت د سولې په برخه کې دوه لوی خنډونه دي

کابل ټکی کام ۰۴سلواغې/۱۳۹۴، احمدالله مهاجر
پرون د قطر پلازمینه دوحه کې د افغانستان د قضیې په اړه د پګواش څېړنیزې مؤسسې له لوري غونډه جوړه شوې ده چې نن به هم روانه وي.
په دغه غونډه کې د ګڼ شمېر افغان مدني فعالانو، سیاستوالو، مبصرینو او ژونالستانو تر څنګ د طالبانو د سیاسي دفتر استازو هم برخه اخیستې ده.
د دغې غونډې په لومړۍ ورځ د طالبانو له لوري د قطر د دفتر مشر شیر محمد عباس ستانکزي پخپله هر اړخیزه وینا کې د «اشغال پای او د اسلامي نظام قیام» د سولې اساسي شرطونه وبلل.
ستانکزي همدا راز زیاته کړه چې ګډ حکومت او امریکایان د سولې په برخه کې دوه ستر خنډونه دي.
ستانکزي د خپلو خبرو په دوران کې د طالبانو په خلاف د تور او جایزو لېستونه ختمول، بندیان ازادول، د دوی په خلاف له زهر جنو تبلیغاتو لاس په سر کېدل د سولې په برخه کې لومړني ګامونه وبل.
ښاغلي ستانکزي همدا شان له ځواکمنو تضمینوونکو جهتونو او ټولنو څخه پرته سوله را تلل نا شوني وبلل.
ستانکزي له بهرنیو ځواکونو څخه غوښتنه وکړه چې تر څو له هېواد څخه ووځي او افغان ولس ته د خپل برخلیک ټاکلو فرصت ورکړل شي.
ده زیاته کړه،کومې ستونزې چې د بهرنیو ځواکونو پورې اړه لري له دوی سره به مخامخ وڅېړل شي.
ده وویل هغه برخه چې له افغان لوري سره تړاو لري، افغانان پخپلو کې د هغو د حل لپاره تیاری لري.