لښکرګاه ښاریان: دولت دې د بهرنیو پیسو په را کړه ور کړه بندیز ولګوي

کابل ټکی کام ۰۴سلواغې/۱۳۹۴، احمدالله مهاجر
هلمند ولایت د هېواد له هغو ولایتونو څخه دى چې د پاکستان هېواد کلدارې او د نورو هېودادونو کرنسۍ په پراخ ډول پکې تبادله کیږي، د دې کار په مخنيوي کې د دغه ولایت د لښکر ګاه ښاریانو له دولت څخه د جدي اقدام غوښتنه کړې ده.
ښاریان وايي، که دا کار ترسره شي نو د دوى په اند د افغانیو ارزښت به لوړشي، او هم به پر بهرنیو پیسو د را کړې ور کړې ناروا دود ورک شي.
ښاریان همدا شان وايي، لښکر ګاه کې د موټرو پلورل او اخیستل، رهنمایي معاملات او تقریباً ټولې سوداګریزې چارې پر پاکستانیو کلدارو کیږي.
د افغانستان بانکي مدیریت پخوا د بهرنیو اسعارو په را کړه ورکړه باندې کلک بندیز لګولی وو، خو د دغه پرېکړې سره سره بیا هم په ګڼو ولایتونو کې دا ستونزه نه ده حل شوې.
د یادولو ده چې د هلمند ملي بانک مسئولینو له رسنیو سره پر یاده موضوع له خبرو کولو ډډه کړې ده.