کابل ټکی کام (شنبه، ۲۷ تله ، ۱۳۹۸ل)
دپاکستان لومړي وزیر عمران خان نن د پاکستان له یوشمېر وربللو ملایانو څخه دخپل حکومت په ساتنه کې د همکارۍ غوښتنه کړې ده.
عمران خان د مولانا فضل الرحمان د لاریون له وېرې ددغه هېواد له مشهورو ملایانو څخه یاده غوښتنه نن په یوه لیدنه کې کړې ده.
ده له پاکستاني ملایانو غوښتي چې په پاکستان کې د تفرقو مخه ونیسي او د حکومت په ساتنه کې ورسره جدي همکاري وکړي.
دده په خبره له کوم لاریون وېره نه لري خو زیاتوي چې په ډېرو مسایلو کې د ملایانو سلا مشورې غواړي او دوی د پاکستان په حکومت کې مهم دي.
سره له دې هم مولانا فضل الرحمن ویلي چې دوی د اکتوبر په ۲۷ مه خپل لاریون پلان کړی دی او له خپلو غوښتنو به په هېڅ صورت تېر نه شي.
مولانا فضل الرحمن وړمه ورځ په یوه اعلامیه کې له عمران خان څخه د استعفی غوښتنه کړې وه؛ خو عمران پر ځای ددې چې مؤدبانه غبرګون وښیي، په ځواب کې توهین آمیزه لهجه کارولې وه.
