(کابل ټکی کام، ۱۳۹۸، تله ۲۸، يکشنبه)
د امریکا دفاع وزير مارک اسپر وايي، په سوريه کې د حالاتو د ترینګليتيا له کبله هڅه کيږي چې خپل ځواکونه عراق ته ولېږدوو.
اسپر ويلي، چې دا مهال په سوريه کې زر تنه امریکايي عسکر ميشت دي او عراق ته به د دې لپاره ولېږل شي چې هلته بیا ځلې د داعش د مخنیوي لپاره ديره کړل شي.
هغه پرون شنبه وويل، چې د سوريې له شمال شرق څخه به د امریکايي ځواکونو وتل څو اوونۍ وخت ونيسي.
نوموړي زياته کړه، امریکايي پوځيان عراق ته د دوو موخو لپاره لېږل کيږي چې لومړی د عراق په دفاع کې مرسته او د داعش سره د مبارزې ماموریت مخته وړل دي.
شاوخوا دوه اوونۍ مخکې د امریکا ولسمشر ټرمپ له سوريې څخه د امریکايي ځواکونو د وتلو اعلان وکړ چې ورسره سم ترکيې د سوريې سره پر پوله د هغه کردي وسله والو پر ضد عمليات پيل کړل چې ترکيه يې ترهګر بولي.
امریکا تر دې وړاندې په سیمه کې د کرد وسله والو ملاتړ تر شاه درلود چې وخت ناوخت يې په سيمه کې د داعش پرضد ګډ عملیات ترسره کول.
دا مهال په سیمه کې د عملیاتو پر سر د امريکا او ترکيې حالات ترینګلي دي چې امریکا د ترکيې پر ځينو لوړپوړو چارواکو بنديزونه لګولي او غوښتنه کوي چې عملیات دې ودرول شي.
د راپورونو له مخې، ترکيې یوه لوړرتبه امریکايي پلاوي سره موافقه کړې چې تر ۱۲۰ ساعته پورې د سوريې په شمال کې پوځي عملیات دروي خو کرد مليشه ځواکونه به د سوريې پولې ته نږدې له امن سيمو ووځي.
په عين حال کې د امریکا دفاع وزارت یوه بل چارواکي ويلي چې عراق ته د امریکايي ځواکونو د لېږلو پريکړه قطعي نه ده او که سوريه کې حالات خراب شي نو امريکايي پوځيان به یو ځل بيا هلته خپل ماموريت ته دوام ورکړي.
