کابل ټکی کام (یکشنبه، ۲۸ تله ، ۱۳۹۸ل)
د امریکا د کانګرس د بهرنیو اړیکو کمېټې دوو تنو غړو یوځل بیا دطالب او امریکایي استازو ترمنځ ددرېدلو خبرو بیا پیل ته خوشبیني ښودلې.
یادو غړو چې په دې وروستیو کې یې افغانستان ته سفر کړی تازه د امریکا د سولې انسټیټیوټ ته د خبرو پرمهال د طالبانو او زلمي خلیلزاد ترمنځ د سولې مذاکراتو د بیا پيل په تړاو خوشبیني ښيي.
سوسن داویس وایي، چې ممکن د طالبانو او امریکا ترمنځ د سولې خبرې بیا پیل شي.
په ورته وخت کې د امریکا د کانګرس د بهرنیو اړیکو کمېټې يوه بله غړې بیا د سولې پروسې پر ټول شمولتوب ټینګار کوي.
پر همدې مهال د امریکا د سولې انسټیټیوټ ریيس وايي، چې افغانان اوس تر بل هر وخت ډېر سولې ته اړتیا لري.
د سولې مذاکراتو بیا پيل ته د امریکا د کانګرس د غړو خوشبیني داسې مهال ده، چې تازه د افغان سولې لپاره د امریکا ځانګړي استازي زلمي خلیلزاد هم ویلي، چې امریکا په افغانستان کې سیاسي جوړ جاړي ته ژمنه ده.
تردې وړاندې هم یوشمېر بهرنیو ورځپاڼو او امریکایي جګپوړو چارواکو دمذاکراتو له بیا پیل خبر ورکړی و، او روانه شخړه یې یواځې له سیاسي لارو چارو دحل وړ بللې وه.
