کابل ټکی کام (يکشنبه، ۲۳ تله ، ۱۳۹۸ل)
د کشمیر په لانجمنې پولې د پاکستاني او هندي پوځیانو ترمنځ ډزې تبادله شوي، چې د دواړو خواوو د پوځي چارواکو په خبره نهه تنه په کې وژل شوي دي.
د هندي پوځ وياند ویلي چې پاکستاني عسکرو د کشمیر د لانجمنې کرښې په اوږدو کې د هند په یوې سرحدي پوستې او د ملکي وګړو په یوه سیمه برید کړی، چې دوه سرتیري او یو ملکي وګړی په کې وژل شوي دي.
د هندي پوځ ویاند راجیش کالیا ویلي چې د پاکستاني ځواکونو په ډزو کې درې نور ملکي وګړي ټپیان شوي هم دي. هغه زیاته کړه چې دا کار د هند او پاکستان ترمنځ د ٢٠٠٣م کال له اوربند څخه ښکاره سرغړونه ده.
وروسته بیا د پاکستان پوځ ادعا وکړه چې د هندي سرتیرو له خوا د اوربند د ماتیدو په پايله کې د پاکستان تر کنترول لاندې کشمیر کې پنځه ملکي کسان او یو سرتیری وژل شوي او درې ملکي وګړي او دوه عسکر ټپیان شوي دي.
هند او پاکستان د کشمیر پر سر د جګړو اوږده مخينه لري او دغه نوې پیښې په داسې حال کې کیږي چې هند اګست کې تر خپل واک لاندې کشمیر ځانګړی قانوني حیثیت، چې په قانون کې ورته د نیمه خپلواکې سیمې په سترګه کتل کېدل، لغوه کړ او هم یې سل ګونه زره پوځیان هلته میشت کړل.
