کابل ټکى کام (شنبه ، ۴ لړم ، ١٣٩٨ل)
د غوڅ ملاتړ ماموریت عمومي قومندان جنرال سکاټ مېلر وایي، څو پورې چې له طالبانو سره د سولې یو تړون نه وي تر لاسلیک شوی، تر هغې به ددې ډلې پر وړاندې ددولتي ځواکونو په ملاتړ جګړه وکړو.
مېلر د ناټو غړو هېوادونو د دفاع وزیرانو تر غونډې وروسته یوې خبري ناستې ته ویلي، افغانان سوله غواړي او په خبره یې نور باید په دې هېواد کې ناپایه جګړه پای ومومي.
یاده ناسته کې دناټو عمومي منشي ینس سټولټنبرګ هم د روانې جګړې په پایته رسولو تاکید وکړ او ویلي یې و چې روانه جګړه یواځې له سیاسي لارو چارو دحل وړ ده؛ باید مذاکرات پیل شي.
دا په داسې حال کې ده چې د ګډ حکومت د دفاع وزارت سرپرست اسدالله خالد هم یادې ناستې ته په خبرو کې وویل، د سولې تړون ته تر رسېدو پورې به د طالبانو پر وړاندې مبارزه روانه وي.
