کابل ټکى کام (يکشنبه ، ٥ لړم ، ١٣٩٨ل)
نن يکشنبه د اکتوبر پر ۲۷مه نيټه له پلان سره سم د پاکستان د مذهبي ګوند جمعيت علماء اسلام په مشرۍ د حکومت اپوزیسیون ګوندونو د آزادۍ مارچ په نوم لاريون د دې هيواد له ستر ښار کراچۍ څخه پيل کړ.
ټاکل شوې چې د اکتوبر تر ٣١مې نيټې به لاريون کوونکي ځانونه پلازمينې اسلام آباد ته رسوي،
جمعیت علما اسلام او نورو مخالفو ګوندونو دا مظاهرې تنظیم کړي دي، چې ښايي لسګونه زره خلک به په کې برخه واخلي.
د جمعیت علما اسلام “ف” ګوند ویاند مفتي ابرابر احمد رسنيو ته ويلي چې د لاريون مشري به په خپله د دغه ګوند مشر مولانا فضل الرحمن کوي.
مفتي ابرار وایي چې د کراچۍ او پاکستان له نورو سیمو څخه د هغوی پلویان په موټرونو کې اسلام اباد ته روان شوي.
دوی د عمران خان حکومت غير قانوني ګڼي او وایي چې د دې هيواد د واکمن پوځ په زور واک ته رسېدلی دی. مخالف ګوندونه وايي د پاکستان د اقتصادي ستونزو اصلي علت وزيراعظم عمران خان او د ده غلطه پاليسي ده.
اسوشیتډپرس خبري آژانس وايي چې جمعیت علما اسلام “ف” ګوند د ښاغلي خان د حکومت د نسکورولو ګواښ کړی دی.
ورته مهال کې ټاکل شوې ده چې په پاکستان کې د هند پر ضد هم مظاهرې وشي. د هند پر ضد مظاهرې پر کشمیر باندې د هند او پاکستان ترمنځ د وروستيو نښتو وروسته پلان شوي دي.
له دغو نښتو او ناندريو وروسته هند تر خپلې ولکې لاندې کشمیر نیمه خپلواکي ختمه کړه چې ورسره د دواړو هېوادونو له وړاندې خرابې اړیکې نورې هم کړکيچنې شوې.
