نشنل انټرسټ: امریکایي ځواکونه له سعودي څخه د ایران څارنه کوي
کابل ټکى کام (دوشنبه، ۱۳ لړم ، ١٣٩٨ل)
نشنل انټرسټ نشریه وایي، د واشنګتن او تهران له کړکېچ وروسته زرګونه امریکايي عسکر په منځني ختیځ کې د ایران د کنټرول لپاره ځای پر ځای شوي دي.
یاده نشریه زیاتوي، د منځني ختیځ د نورو هېوادونو تر څنګ په سعودي عربستان کې هم د امریکا زرګونه عسکر او الوتکې د ایران د کنټرول لپاره ځای پر ځای شوي، او ددې هېواد څارنه کوي.
ددغه نشریې په خبره، امریکا غواړي په دې توګه په سیمه کې د ایران فعالیتونه کنټرول کړي او ددغه هېواد د نورو ورانکاره اقداماتو مخه ونیسي.
په منځني ختیځ کې د امریکا حضور وروسته له هغه پراخ شو چې د سعودي عربستان د تېلو پر چاڼځایونو ډرون بریدونه وشول.
امریکا په تازه اقدام کې له ترکیې سره پر پوله په سوریه کې هم خپل ځواکونه بېرته ځای پر ځای کړي دي.
د ایران او امریکا ترمنځ روان کړکېچ وروسته له هغه پراخ شو چې واشنګتن تهران له اټومي تړون څخه په سر غړاوي تورن کړ، او ځینې بندیزونه یې پرې ولګول.
