کابل ټکى کام (دوشنبه، ۲۰ لړم ، ١٣٩٨ل)
ولسمشرۍ ټاکنو ته نوماند رحمت الله نبیل وایي، په تېرو ټاکنو کې له ۴۴ تر ۴۸ سلنې رایو کې درغلي شوې ده، او دا ښکاره کوي چې دغه درغلۍ سیستماتیکې وې.
هغه د ګڼو تورونو ترڅنګ دولت ساز ټیم ته په اشارې وویل، اوسني حکومت تر ټاکنو مخکې لا د درغلۍ پلان درلود او په همدې نیت یې بیت المال لوټ کړی او له هغو یې د خپلو شخصي منافعو لپاره ګټه اخیستې ده.
نبیل وایي، حکومت هڅه کوي پر ټاکنو کمیسیون د فشارونو له لارې ناپاکې رایې حساب او سیسټم ته داخلې کړي.
هغه زیاته کړې، د شرم ځای دی چې یو څوک د ټولو دولتي امکاناتو درلود سره سره، درغلیو ته سترګې په لاره وي او په خبره یې، د درغلیو له لارې واک ته رسېدل هېواد له مطلق بحران سره مخ کوي.
نوموړي د خپلو خبرو پر دوام وویل، دولت ساز ټیم له لویې څارنوالۍ څخه غوښتنه کړې چې یو شمېر کسانو ته دوسیې جوړې کړي.
نبیل پر نړیوالو غږ کړی چې باید درغلیو ته مشروعیت ورنکړي ځکه چې په وینا یې، دوی به خپلو ځینو ملګرو ته ګټه ورسوي، خو د افغانستان له خلکو سره به ستره جفا وکړي.
بلې خوا بیا اجرایه رئیس عبدالله عبدالله د رایې بیا شمېرلو په غبرګون کې د ټاکنو کمیسیون ځینې دفترونه تړلي او کارکونکي یې ګواښلي دي.
