شمالي وزيريستان: بمي چاودنه کې درې پوځيان وژل شوي
(کابل ټکی کام، ۱۳۹۸ لړم ۲۲، چهارشنبه)
د پاکستان پوځ وايي، چې شمالي وزيريستان کې د سړک غاړې بمي چاودنه کې څلورو پوځيانو ته مرګ ژوبله اوښتې ده.
د پوځ په اعلاميه کې راغلي، پر يادو پوځيانو د ګزمې پر مهال چاودنه شوې چې په ترڅ کې يې درې تنه وژل شوي او یو تن بل ټپي دی.
تر اوسه د دغه چاودنې مسؤولیت کومې ډلې په غاړه نه دی اخيستی خو تيره اوونۍ هم په شمالي وزيريستان کې د يوې بمې چاودنې په ترڅ کې څلور پوځيان وژل شوي و چې مسؤوليت يې د حزب الاحرار په نوم پاکستانۍ وسله والې ډلې په غاړه اخيستی و.
د يادونې ده، چې تيره ورځ په پنجاب کې هم په یوه وسله وال برید کې دوه پوليس، دوه امنیتي کارمندان او یو خبريال وژل شوي و.
