سړی حیران شي چې دا مسلمانانو ولې له خپلو اسلامي لارښوونو نه مخونه تر دې بریده اړولې دي چې د هیڅ اسلامي ارزښت په تر پښولاندې کولو ډیل نه دي. د اسلامي هیوادونو زیاتره حاکمان هغه څه کوي چې د کفري هیوادونو مشران پرې شرميږي، خو سره له ډې هیڅ ډول نه د شرم احساس کوي، او نه له خدای ویره لري نه له آخرت او نه له ملت، بس یواځې د شین سترګو امریکایانو او انګریزانو دومره ویره لري چې له جهنم څخه یې نلري.
هغه یوه عالم چې په کفري هیوادونو کې یې هم د خپل ژوند څه برخه تیره کړې او ډیری تجربې یې لیدلي او د اسلامي هیوادونو او مسلمانانو او حاکمانو سره یې پرتله کړي وایي چې: وجدت الاسلام في غیر المسلمین و لم اجد الاسلام فی المسلمین، یعنی اسلام مې په غیر مسلمانانو کې ولید خو په مسلمانانو کې مې اسلام ونه لید.
اوس ته دې ته وګوره چې په غنی وایي چې ما سره نږدې 16000 افغانان د طالبانو په نوم په زندانونو کې پراته دي، او څو ورځې وړاندې یې چې درې تنه د امریکا او ټرمپ د برګو سترګو په پایله کې خوشي کول، داسې خفه و لکه پلار یې چې مړ شوی وی، او د خوشې کولو په اړه یې په خپله وینا کې رسنیو ته وویل چې دا پریکړه ورته خورا سخته ده!!!
ځکه چې داسې مسلمانان یې د ظلم او جبروت له منګولو خلاصیدل چې د امریکایانو قاتلان وو، او دا چې د امریکا د فشار په پایله کې یې له منګولو ووځي هم د حسرت او افسوس څرګندونه کوي او وایی چې دا پریکړه ورته خورا سخته ده، معنا دا چې د ده زړه نه دی چې خوشي شي خو څه وکړي د بادار امر دی او بادار چې نان میدهد فرمان میدهد.
بل پلو ته ګوره چې خبر دی چې ټرمپ هغه دوه امریکایان چې په افغانستان کې یې بې ګناه ملکي افغانان وژلي او د محکمې له سوال او ځواب او فیصلې سره مخ وو په ناڅاپي توګه او د له ټولو نظامي او قضایی اصولو نه په سرغړونې سره معاف اعلان کړل، معنا دا چې ډیر ښه کار یې کړی چې بې ګناه ملکي افغانان یې وژلي، او دا کار به په افغانستان کې پرتو امریکایی فوځیانو ته نور مورال هم ورکړی چې بیګناه افغانان تر خپل تیغه تیر کړي.
همداسې که د څو لسیزو غمیزو ته نظر واچول شي چې څومره ظلمونه پر مسلمانانو شوي تر ټولو سخت ظلمونه پرې خپلو د اسلامي هیوادونو حاکمانو کړي دومره چې کفارو به په ګوانتانامو او نورو زندانونو کې نه وي کړي.
مسلمانانو ته ډېر د شرم ځای دی چې داسې حاکمانو ته رایې ورکوي چې هغوی له کفارو نه هم سخت زړي دي او خپل ملت په ډیری بې دردۍ وژني او هیڅ پروا یې هم پرې نه وي.
همدا راز که د کفري هیوادونو په اړه تحقیق وشي هلته له هیڅ انسان سره دومره مظالم نه ترسره کیږي لکه څومره چې یې په اسلامي هیوادونو حاکم د کفارو لاسپوڅي ترسره کوي. نو آخر تر څو به ملت خپل سر ټیټ نیولی وي او پر خپلو خلکو د مظالمو په اړه به غبرګون نه ښیئ؟
رښتیا هم چې نن سبا کفارو کې رحم شته خو په اسلامي حکمرانانو کې نه ذره ایمان پاتې دی او نه ذره بشري رحم، او لامل یې دادی چې کفار غواړي د مسلمانانو په لاس مسلمانان ووژني څو خپل ځانونه بدنام نکړي او مسلمانو حاکمانو نه د ولسونو او پرګنو ذهنیتونه واړوي خو نه حکمرانان په دې هکله په خپل ګریوان کې فکر کوي او نه هم ملت د دغو ظالمو حاکمانو ګریوان ته لاس اچوي.
تاسې وګورۍ د هیواد په هره سیمه کې چې عملیات کیږي نو بهرني فوځیان شاته او افغاني فوځیان مخې ته کوي دا د دې لپاره چې که وژل کیږي هم به افغاني فوځیان ووژل شي او که ظلم او وحشت جوړوي نو هم به پری افغان فوځیان لاس پورې کوي، او زمونږ فوځیان هم د ډالرو په مقابل کې آن خپلې میندې او خویندې هم ورکوي پاتې خو لا دا چې د افغانان کور ته ننوځي او افغاني میرمنې بې پته او بې عزته کوي. او بله عجیبه خبره لا داده چی یو شمېر پلورل شویو افغانانو د انس حقاني او دوه ملګرو یې د خوشې پر وړاندې منفي عکس العمل وښود او لاریون یې هم ترسره کړ خو دا چې اوس ټرمپ د ملکي افغانانو دوه وحشي قاتلان وبخښل، دغو بې وجدانو خلکو چې د انس حقاني او نورو طالب بنديانو د خلاصون په اړه يې مظاهره کړې وه، هیڅ اواز پورته نه کړ، په اړه يې بلکل خاموش او غلي دي، نو دا ډول کارونه په څه دلالت کوي؟ تاسې خپله قضاوت وکړﺉ! د مظلومو افغانانو دوه وحشي قاتلان بخښل کېږي او له محکمې بچ کېږي خو هغه څوک چې د خپل دين د سرلوړۍ، د وطن د ازادۍ او د مؤمنانو د سوکالۍ لپاره جنګېږي، د مسلمانانو په لاسونو زندانونو ته اچول کېږي او بيا په ډېر وحشت سره يا د اعدام سزا ورته اورول کېږي او يا هم شل او اتلس او نورې د اوږده عمر قيد او لنډ عمر قيدونو سزاګانې ورته اورول کېږي.
