(کابل ټکی کام، ۱۳۹۸ لړم ۲۶، يکشنبه)
د راپورونو له مخې، برتانيا په افغانستان او عراق کې د خپلو ځواکونو پر جنګي جرمونو او د هغوی له خوا په ترسره شويو ناقانونه وژنو پرده اچولې.
په یوه پلټنه کې چې يوولس برتانوي پلټونکو سره پکې خبرې شوي هغوی ورته د کره شواهدو له مخې ويلي چې افغانستان او عراق کې جدي پېښې نه دي څارل شوي، د ربړونو او وژنو پيښو ته پاملرنه نه ده شوې.
راپور زياتوي، افغانستان کې په کال ۲۰۱۴ کې د جنګي جنايتونو د تورونو د پلټنې لپاره د نارتموور عملياتو په نامه یوه ډله جوړه شوې وه چې د ۳۵ ناقانونه وژنو پېښو د ارزولو وروسته ورته دا موقع هم په لاس ورنکړل شو چې له يوه افغان شاهد سره خبرې وکړي او د حکومت له خوا لغوه اعلان شوه.
یوازې برتانوي ځواکونه نه دي چې په افغانستان کې يې جنګي جنايتونه ترسره کړي بلکې له تيرو شاوخوا اتلس کلونو راهيسې د ناټو غړي هیوادونه چې د امریکا په ملاتړ راغلي په افغانستان کې يې جنګي جرمونه ترسره کړي، شخصي زندانونه لرل، شکنجې، د سياسي بنديانو شکنجه، د غير قانوني ميتودونو کارول او د عامو افغانانو وژنې او پر کليو بمبارۍ ترسره کړي چې د ښځو، ماشومانو او سپينږيرو په شمول پکې زرګونه کسانو ته مرګ ژوبله اوښتې او معيوب شوي دي.
که څه هم د جرمونو نړیوالې محکمې مشرې ميرمن فاتو بنسوادا دوه کاله مخکې ويلي و چې دوی به افغانستان کې د جنګي جرمونو اړوند پلټنې ترسره کړي خو د شنونکو په باور په وروستيو کې يې د ملګرو ملتونو د څارونکو په شتون کې د ترسره شويو جنګي جرمونو ناسمه پريکړه وکړه او افغانستان کې يې د جنګي جرمونو په اړه هراړخيزې څېړنې او پلټنې ودرولې.
دا په داسې حال کې ده، چې تيره ورځ د امریکا ولسشمر هغه دوه امریکايي پوځيان وبخښل چې د عامو افغانانو په وژنه تورن شوي و.
