(کابل ټکی کام، ۱۳۹۸ لړم ۲۹، چهارشنبه)
د افغانستان د انتخاباتو کمېسیون وايي، چې د ولسمشرۍ دوهم پړاو ټاکنو لپاره بشپړ تخنیکي او مالي چمتووالی لري.
د دغه کمېسیون وياند ذبیح الله سادات وايي، دا مهال د ولسمشري د لومړنيو پايلو د اعلان لپاره چمتووالی روان دی خو په وينا يې که ټاکنې دوهم پړاو ته ولاړې شي نو انتخاباتو کمېسيون د بيا ټاکنو ترسره کولو لپاره له تخنیکي او مالي پلوه کومه ستونزه نه لري.
د ولسشمرۍ ټاکنو شاوخوا دوه مياشتې پوره کيدونکي دي خو په رايو کې د درغليو، کمېسیون کې د تخنیکي ستونزو- اختلافاتو او وخت په وخت پکې جنجالونه رامنځته کيږي چې لا هم لومړنۍ پايلې نه دي اعلان شوي.
په وروستيو کې د ولسمشرۍ ټاکنو د څه باندې اته زره محلونو د رايو بيا شميرنې پر سر اختلافاتو دغه پروسه ځنډولې ده خو تازه د انتخاتو کمېسیون وياند سادات وايي، تر اوسه په پنځلس ولايتونو کې د رايو د څارنې او بیا شميرنې پروسه بشپړه شوې او په ديارلس ولايتونو کې دوام لري.
نوموړی زياتوي، شپږ ولايتونو کې د اعتراض کوونکو نوماندانو پلويانو انتخاباتو کمېسيون ته د رايو بيا شميرلو اجازه نه ده ورکړې.
د ثبات او همپالنې ټیم د رايو بيا شميرلو سره مخالفت ښودلی په وينا يې کمېسيون غواړي چې غير بايومټریک او تقلبي رايې د دولت ساز ټیم په ګټه شمار کړي او دغه راز پرون د ولسمشرۍ بل نوماند ګلبدین حکمتیار ويلي و چې رايې دې له سره وشمارل شي.
تر دې مخکې د ولسمشرۍ ټاکنو نهه تنو نوماندانو ويلي و چې په ټاکنو کې د درغليو، تخنیکي ستونزو،کمېسيون کې د اختلافاتو او د خلکو د کمرنګه ګډون له کبله ورته د ټاکنو پايلې د منلو وړ نه دي.
