کابل ټکى کام (جمعه، ۳۱ لړم ، ١٣٩٨ل)
امریکایي ولسمشر ډونالډ ټرمپ پرون په ډوور هوايي اډه کې د هغو دوه امریکايي پوځیانو د مړو درناوي ته ولاړ، چې تېره اوونۍ په لوګر ولایت کې د هلیکوپترې د نسکوریدو په پېښه کې ووژل شول.
له ټرمپ سره د نوموړي میرمن میلانیا ټرمپ، د لوی درستیزانو کمیټې رییس او د ملي امنیت سلاکار هم ملتیا کوله.
ټرمپ د وژل شویو پوځیانو له کورنیو سره هم ولیدل، دهغوی قربانۍ یې وستایلې، د خواخوږۍ اظهار یې وکړ او دمرستو ژمنه یې وکړه.
دغه دوه پوځیان د لوګر ولایت د څرخ ولسوالۍ په پنګرام سیمه کې د پوځي عملیاتو پرمهال د الوتکې د نسکورېدو په پېښه کې وژل شوي وو.
د دې هلیکوپترې د نسکورېدو مسئولیت وسلوالو طالبانو منلی وو او دایې د خپلو الفتح عملیاتو د کامیابو عملیاتو ګړندۍ لړۍ بللې وه.
